(ក្វាងចូវ, ចិន)៖ អភិបាលខេត្តកំពង់ស្ពឺ លោក វ៉ី សំណាង នៅថ្ងៃទី២៩ ខែកញ្ញា ឆ្នាំ២០១៨ បានដឹកនាំប្រតិភូ ដែលមានអភិបាលស្រុកទូទាំងខេត្ត ដើម្បីទៅទស្សនកិច្ចនៅស្រុកភូឌូ ខេត្តក្វាងចូវ ប្រទេសចិន​ រយៈពេល៣ថ្ងៃ ចាប់ពីថ្ងៃទី២៩ ខែកញ្ញា រហូតដល់ថ្ងៃទី១ ខែតុលា ឆ្នាំ២០១៨។

យោងតាមមន្ត្រីសាលាខេត្តកំពង់ស្ពឺ ដែលអមដំណើរជាមួយអភិបាលខេត្ត បានប្រាប់មកភ្នាក់ងារ Fresh News ពីលទ្ធផលជំនួប រវាងអភិបាលស្រុកភូឌូ និងលោក​ វ៉ី​ សំណាង ឲ្យដឹងថា មានវិនិយោគិនចិនជាច្រើន នៅស្រុកភូឌូ នឹងមកវិនិយោគនៅក្នុងខេត្តកំពង់ស្ពឺ។ លោកថា ខាងអភិបាលស្រុកភូឌូ បានស្នើសុំអាជ្ញាធរកម្ពុជា ឲ្យជួយមើលថែវិនិយោគិនចិន ពេលពួកគេមកវិនិយោគនៅខេត្តកំពង់ស្ពឺផងដែរ។

មន្ត្រីសាលាខេត្តកំពង់ស្ពឺ បានបញ្ជាក់យ៉ាងដូច្នេះថា «នៅថ្ងៃហ្នឹងលោកអភិបាល ជួបពិភាក្សាជាមួយអភិបាលស្រុកភូឌូ ខេត្តក្វាងចូវ ប្រទេសចិន។ ខ្លឹមសារនៃជំនួបហ្នឹងគឺថា លោកអភិបាលខេត្ត បានអញ្ជើញអ្នកវិនិយោគិនស្រុកភូឌូ មកវិនិយោគនៅខេត្តកំពង់ស្ពឺយើង។ អ្នកភូឌូ ជំនាញគេខ្លាំងហ្នឹងគឺ ពាក់ព័ន្ធនឹងការធ្វើកាបូប គ្រឿងសម្អាងរបស់នារី។ គេ (វិនិយោគិនស្រុកភូឌូ) ចាប់អារម្មណ៍ទៅវិនិយោគ នៅខេត្តកំពង់ស្ពឺយើង»។

លោកបន្តថា «ខាងភូឌូបានយល់ពីសក្តានុពលរបស់ខេត្តកំពង់ស្ពឺយ៉ាងខ្លាំង ហើយគាត់ (អភិបាលស្រុកភូឌូ) យល់ព្រមថានឹងជំរុញអ្នកវិនិយោគិនស្រុកភូឌូ ឲ្យទៅវិនិយោគ នៅខេត្តកំពង់ស្ពឺយើង ហើយស្នើឲ្យអាជ្ញាធរបស់យើង ជួយមើលថែវិនិយោគិនភូឌូងហ្នឹងផង»៕