(ភ្នំពេញ)៖ លោក ជា ចាន់តូ អគ្គទេសាភិបាលធនាគារជាតិនៃកម្ពុជា បានបង្ហាញពីកិច្ចខិតខំប្រឹងប្រែង របស់រាជរដ្ឋាភិបាលកម្ពុជា ក្នុងការអភិវឌ្ឍន៍សេដ្ឋកិច្ច និងសង្គមឲ្យរីកចម្រើនទៅមុខ។ ការប្រឹងប្រែងឥតឈប់ឈរ របស់រាជរដ្ឋាភិបាលនេះបានធ្វើឲ្យប្រទេសកម្ពុជា​ក្លាយជាប្រទេសមួយ ដែលមានការអភិវឌ្ឍន៍ស្ទើរគ្រប់វិស័យ។

លោកបន្ដទៀតថា ជាក់ស្ដែងវិស័យធនាគារ និងមីក្រូហិរញ្ញវត្ថុបានរីកចម្រើនឥតឈប់ឈរ។ ការរីកចម្រើននេះ បានផ្ដល់ការងារដល់ពលរដ្ឋជាច្រើន ខណៈបច្ចុប្បន្ននេះប្រជាពលរដ្ឋជាង៦ម៉ឺននាក់ បានចូលបម្រើការងារក្នុងវិស័យធនាគារ និងគ្រឹះស្ថានមីក្រូហិរញ្ញវត្ថុ។

ការលើកឡើងបែបនេះ របស់លោក ជា ចាន់តូ ធ្វើឡើងនាឱកាសដែលលោកអញ្ជើញចូលរួមក្នុងវេទិកាស្តីពី «អាជីពការងារក្នុងវិស័យធនាគារ និងការធានារ៉ាប់រង» ដែលកម្មវិធីនេះរៀបចំឡើងដោយវិទ្យាស្ថាន CamEd នាព្រឹកថ្ងៃទី២៩ ខែកញ្ញា ឆ្នាំ២០១៨នេះ។

លោកបន្ដទៀតថា ក្រៅពីការរីកចម្រើនលើវិស័យហិរញ្ញវត្ថុ ក៏មានវិស័យមិនមែនជាធនាគារ មានការរីកចម្រើជាច្រើនដូចជា៖ វិស័យមូលប័ត្រ​, វិស័យធានារ៉ាប់រង និងសោធន វិស័យទាំងនេះបានរួមចំណែកផ្តល់ សេវាហិរញ្ញវត្ថុព្រមទាំងពង្រឹងការជឿជាក់ និងភាពច្បាស់លាស់ចំពោះអនាគត របស់ប្រជាជនដែលជាមូលដ្ឋានគ្រឹះ ក្នុងការពង្រឹងសិទ្ធិសេរីភាព និងលទ្ធិប្រជាធិបតេយ្យនៅកម្ពុជា។

លោក ជា ចាន់តូ បានបន្ថែមថា ការរីកចម្រើនលើវិស័យធនាគារនារយៈពេល២ទសវត្សរ៍នេះ បានរួមចំណែកបង្កើតការងារដោយផ្ទាល់ និងប្រយោល សម្រាប់សេដ្ឋកិច្ចនៅទូទាំងប្រទេស។ លោកថា «ការផ្ដល់ការងារដោយផ្ទាល់មានដូចជា​៖ គ្រឹះស្ថានធនាគារ និងមីក្រូហិរញ្ញវត្ថុបានផ្ដល់ការងារ ដល់ពលរដ្ឋចំនួន៦១,០០០នាក់ កើនឡើង៨ដងបើធៀបនឹងរយៈពេលកាលពី១០ឆ្នាំមុនមានន័យថា ជាមធ្យមផ្តល់ការងារថ្មីក្នុង១ឆ្នាំចំនួន៥ពាន់នាក់ ក្នុងអត្រា២០% »។

លោកបានបន្ដទៀតថា ចំណែកឯការបង្កើតការងារដោយប្រយោលនោះគឺ ផ្អែកទៅលើវិស័យធនាគារតាមរយៈ ការគាំទ្ររបស់ធនាគារក្នុងការបង្កើត ឬពង្រីកអាជីវកម្ម លើវិស័យនានានៃសេដ្ឋកិច្ច។

នាឱកាសនោះលោក ជា ចាន់តូ បានផ្តាំផ្ញើដល់និស្សិតដែលនឹងឈានជើង ចូលទីផ្សារការងារនាពេលអនាគតថា «ដើម្បីចាប់ឱកាសទាំងនេះបានសូម ក្មួយៗត្រូវបន្តខិតខំប្រឹងប្រែងជាប្រចាំ ក្នុងការដុសខាត់ពង្រឹងចំណេះដឹង គុណវុឌ្ឍិ និងគុណធម៌សំដៅត្រៀមខ្លួនរួមចំណែកបំពេញការងារ ក៏ដូចជាអភិវឌ្ឍន៍ លើវិស័យធនាគារនាពេលខាងមុខ»៕