(បាត់ដំបង)៖ នៅថ្ងៃទី២៨ ខែកញ្ញា ឆ្នាំ២០១៨នេះ មន្ត្រីកាំកុងត្រូលខេត្តបាត់ដំបង និងគ្រប់ស្ថាប័នពាក់ព័ន្ធ បានយកប្រហិតចំរុះខូចគុណភាព១៥០ គ.ក សាច់មាន់ និងឆ្អឹងមាន់ខូចគុណភាព៥០ គ.ក ដែលបង្កប់ក្នុងរទេះដឹកបន្លែ-ផ្លែឈើ នាំចូលពីប្រទេសថៃ តាមច្រកប៉ុស្តិ៍ភ្នំដី ស្រុកសំពៅលូន ព្រមទាំងបានដកហូតយកទៅដុតកម្ទេចចោលភ្លាមៗ។
លោក ហាក់ សុខរិន ប្រធានសាខាកាំកុងត្រូល បានឲ្យដឹងថា ដើម្បីទប់ស្កាត់រាល់ទំនិញខូចគុណភាព មុនពេលបុណ្យភ្ជំបិណ្ឌចូលមកដល់ និងចូលរួមការពារសុខភាពប្រចាំថ្ងៃរបស់ប្រជាពលរដ្ឋយើង មន្រ្តីជំនាញបានសហការជាមួយមន្រ្តីមន្ទីរពាណិជ្ជកម្ម និងអាជ្ញាធរដែនដី បានត្រួតពិនិត្យទំនិញនាំចូលពីប្រទេសថៃ នៅមាត់ច្រកប៉ុស្តិ៍ច្រកអន្តរជាតិភ្នំដី ស្រុកសំពៅលូន ដោយស្ទាក់ចាប់បានកាលពីថ្ងៃទី២៧ ខែកញ្ញា ឆ្នាំ២០១៨ នូវប្រហិតខូចគុណភាព១៥០គក្រ និងសាច់មាន់ ឆ្អឹងមាន់ខូចគុណភាព៥០ គក្រ ដែលបង្កប់ ក្នុងរទេះដឹកបន្លែ-ផ្លែឈើ។
លោកប្រធាន បានបញ្ជាក់ថា មន្រ្តីជំនាញនៅតែបន្តសម្រុកចុះត្រួតពិនិត្យជាប្រចាំ ក្នុងការអប់រំតាមប្រព័ន្ធផ្សព្វផ្សាយ តាមរយៈបិទស្ទីកឃើ នៅតាមទីតាំងលក់ទំនិញ ឬអប់រំដោយផ្ទាល់ ប្រាប់ពីផលប៉ះពាល់សុខភាពដោយសារចំណីអាហារ ដាក់លក់នៅលើទីផ្សារ ធ្វើការត្រួតពិនិត្យរាល់ការនាំចូល ការដាក់តាំងលក់ទំនិញខូចគុណភាព ដាក់លាយសារធាតុគីមី គ្មានកាលបរិច្ឆេទច្បាស់លាស់ មិនឲ្យមានធ្វើចរាចរណ៍នៅលើទីផ្សារបន្តទៀត។
លោកក៏បានអំពាវនាវដល់ប្រជាពលរដ្ឋ សូមប្រុងប្រយ័ត្នមុននឹងទិញទំនិញលើទីផ្សារ ពិសេសចំណីអាហារប្រចាំថ្ងៃ សូមពិនិត្យឲ្យបានច្បាស់លាស់ជាមុនសិន ជៀសវាងប៉ះទំនិញខូចគុណភាព ធ្វើឲ្យប៉ះពាល់សុខភាពបងប្អូនទៅថ្ងៃក្រោយ៕
