(ភ្នំពេញ)៖ លោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ នៅថ្ងៃទី២៤ ខែកញ្ញា ឆ្នាំ២០១៨នេះ បានថ្លែងថា ក្នុងនាមលោកជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ គឺលោកមានសិទ្ធិចុះសិក្សាបញ្ហារបស់ជាតិ និងប្រជាពលរដ្ឋ ដោយមិនចាំបាច់មានលិខិតបេសកកម្មក្នុងករណីបន្ទាន់។

លោក ពេជ្រ ស្រស់ បានអះអាងបែបនេះ បន្ទាប់ពីអាជ្ញាធរខេត្តកណ្តាល បានរារាំងដល់សកម្មភាពរបស់លោក មិនឱ្យចុះពិនិត្យ និងសិក្សាលើបញ្ហាដីធ្លីរបស់ប្រជាពលរដ្ឋ២៩២គ្រួសារ នៅស្រុកកណ្តាលស្ទឹង និង ក្រុងតាខ្មៅ ខេត្តកណ្តាល។

លោក ពេជ្រ ស្រស់ បញ្ជាក់ថា «ក្នុងនាមខ្ញុំជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ គឺមានសិទ្ធិចុះសិក្សាបញ្ហារបស់ជាតិ និងប្រជាពលរដ្ឋ ដោយមិនចាំបាច់មានលិខិតបេសកកម្មក្នុងករណីបន្ទាន់។ ម្យ៉ាងវិញទៀត ឯ.ឧ ម៉ៅ ភិរុណ បាននិយាយថា មិនទទួលខុសត្រូវទេបើសិនជាខ្ញុំមានបញ្ហាអ្វីមួយនោះក្នុងដែនដីរបស់គាត់»។

គម្រោងចុះជួបរបស់លោក ពេជ្រ ស្រស់ បានធ្វើឡើងបន្ទាប់ពីប្រជាពលរដ្ឋ ២៩២គ្រួសារ នៅស្រុកកណ្តាលស្ទឹង និងក្រុងតាខ្មៅ បានស្នើដល់ លោកពេជ្រ ស្រស់ ឱ្យជួយចុះពិនិត្យ និងសិក្សាស្រាវជ្រាវ រឿងទំនាស់ដីធ្លី រវាងពួកគេជាមួយក្រុមហ៊ុនហេងអភិវឌ្ឍន៍ ដែលទំនាស់ដីធ្លីនេះត្រូវបានពលរដ្ឋអះអាងថា កើតឡើងរយៈពេល១០ឆ្នាំមកហើយ។

ប៉ុន្តែទោះជាយ៉ាងណា ករណីទំនាស់ដីធ្លីដ៏រ៉ាំរ៉ៃនេះ ធ្លាប់ឆ្លងការកាត់ការដោះស្រាយច្រើនសារមកហើយ ទាំងនៅតុលាការ និងនៅថ្នាក់ក្រសួងជំនាញ។

កាលពីថ្ងៃទី២៥ ខែមិថុនា ឆ្នាំ២០១៨ ក្រសួងរៀបចំដែនដី នគរូបនីយកម្ម និងសំណង់ បានប្រកាសសម្រេច មិនពិនិត្យដោះស្រាយបញ្ហាទំនាស់ដីធ្លីរបស់ ពលរដ្ឋ២៩២គ្រួសារ នៅស្រុកកណ្តាលស្ទឹង ខេត្តកណ្តាលបន្តទៀតទេ ដោយសារតែទំនាស់ដីធ្លីនេះ មានដីការសម្រេចរបស់តុលាការខេត្តកណ្តាលរួចហើយ ពោលគឺធ្វើឡើងតាំងពីឆ្នាំ២០០៨ មកម្ល៉េះ៕