(គូឡាឡាំពួ)៖ អតីតនាយករដ្ឋ​មន្រ្តីម៉ាឡេស៊ី លោក ណាជីប រ៉ាហ្សាក់ (Najib Razak) ត្រូវប៉ូលិស​អះអាងថា អាចប្រឈមមុខនឹងការ​ចោទប្រកាន់ថ្មី​ចំនួន​ជាង ​២០ករណី ថែមទៀត ជុំវិញរឿងអាស្រូវ​ពុករលួយ​ទាក់ទិន​មូលនិធិរដ្ឋ 1MDB។ នេះបើតាម​ការដកស្រង់ការផ្សាយចេញពី​​ទីភ្នាក់ងារ​​ព័ត៌មានចិន ស៊ីនហួរ នៅរសៀលថ្ងៃព្រហស្បតិ៍ ទី២០ ខែកញ្ញា ឆ្នាំ២០១៨។

លោក Najib ត្រូវបានចាប់​ខ្លួនសាជាថ្មីម្តង​ទៀត ដោយគណៈកម្មការ​ប្រឆាំងអំពើពុករលួយ​ម៉ាឡេស៊ី (MACC) កាលពីថ្ងៃពុធ​ម្សិលមិញ ពាក់ព័ន្ធនឹង​ករណី 1MDB មុនត្រូវបញ្ជូនមក​កាន់ប៉ូលិសដើម្បីធ្វើការ​សាកសួរ ហើយ MACC បាន​បញ្ជាក់ថា​ លោក Najib នឹងត្រូវ​ចូល​ខ្លួនក្នុងតុលាការ​នារសៀល​ថ្ងៃព្រហស្បតិ៍នេះ ដើម្បីទទួលការ​ចោទ​ប្រកាន់។

បើតាមការឲ្យដឹង​ពីប៉ូលិសម៉ាឡេស៊ី បទ​ចោទ​ប្រកាន់​រហូតដល់ ២១ករណី ត្រូវបានត្រៀម​រួចជាស្រេច​ទាក់ទង​នឹង​លុយ​​ចំនួន​ ៦៨១លាន​ដុល្លារ ដែលមានក្នុង​គណនីធនាគារ​របស់លោក កាលពីអំឡុង​ពេលដែលរូបលោក​​នៅកាន់តំណែងជា​មេដឹកនាំប្រទេស ក្នុង​នោះ​រួម​មាន​ការ​ទទួល ប្រើប្រាស់ និងផ្ទេរ​​លុយខុស​ច្បាប់ ទៅកាន់អង្គភាព​ដទៃៗ​ជាដើម។ ទឹកប្រាក់ដ៏​ច្រើននេះ​ត្រូវបានគេសង្ស័យថា ជា​លុយ​​កិបកេង​ពី​មូលនិធិ 1MDB ប៉ុន្តែលោក Najib បាន​បដិសេធថា វាបានមកពីការបរិច្ចាគ​​ដោយស្រប​ច្បាប់​​របស់​​អារ៉ាប៊ី សាអូឌីត។

គួរជម្រាបថា ចាប់តាំងតែពីចាញ់ឆ្នោត​កាលពីខែឧសភា​ រហូតមកទល់ពេលនេះ លោក Najib Razak បានប្រឈមមុខ​រួចទៅហើយ ទៅនឹង​ការចោទ​ប្រកាន់ចំនួន ០៧ករណី ដោយក្នុងនោះ ០៣ករណី ទាក់ទិនការរំលោភ​លើទំនុកចិត្ត ០១ករណីទាក់ទិន​ការរំលោភអំណាច និង​០៣ករណីទាក់​ទិនការលាង​លុយកខ្វក់។

បទចោទប្រកាន់​ទាំងអស់នេះសុទ្ធតែ​ពាក់ព័ន្ធ​នឹងការផ្ទេរលុយ​ចំនួន ​១០.៣លានដុល្លារ ​ទៅ​ក្នុង​គណនីធនាគារ​របស់លោក​ដោយអង្គការ SRC International ដែលធ្លាប់ជា​ផ្នែកមួយនៃ​មូលនិធិ 1MDB ហើយ​លោក Najib បានច្រាន​ចោលរាល់ការ​ចោទប្រកាន់​ទាំងអស់ ហើយធ្លាប់និយាយថា ការកាត់ក្តី​នាខែកុម្ភៈ ឆ្នាំ២០១៩ គឺជាឱកាសដ៏ល្អ​បំផុត ដើម្បី​លុប​លាង​រឿងអាស្រូវរបស់​​លោក​៕