(ម៉ូស្គូ)៖ ករណីបាត់យន្តហោះយោធាខ្នាតធំរបស់រុស្ស៊ី រួមជាមួយមនុស្សនៅលើនោះ ១៤នាក់ នៅក្នុងដែនសមុទ្រមេឌីទែរ៉ាណេ បូករួមទាំងការបាញ់ស្រោចមីស៊ីលទៅលើប្រទេសស៊ីរីបន្ថែមទៀតនោះ កំពុងក្លាយជាបញ្ហាយ៉ាងក្តៅគគុកជាថ្មីនៅតំបន់មជ្ឈិមបូព៌ា ខណៈអាមេរិកចោទស៊ីរីថា ប្រព័ន្ធការពារដែនអាកាសស៊ីរីបានច្រឡំបាញ់ទម្លាក់យន្តហោះយោធារុស្ស៊ី ហើយរុស្ស៊ីជាជនរងគ្រោះវិញបានចោទថា នាវាចម្បាំងបារាំងឯណោះទេជាអ្នកបាញ់ទម្លាក់ និងស៊ីរីបានចោទថា វាជាទង្វើរបស់ប្រទេសអ៊ីស្រាអែល។ នេះបើតាមការដកស្រង់ការផ្សាយចេញពីវែបសាយ CNN នាព្រឹកថ្ងៃអង្គារ ទី១៨ ខែកញ្ញា ឆ្នាំ២០១៨។
ហេតុការណ៍បាត់យន្តហោះរុស្ស៊ីខាងលើ បានកើតមានឡើងចំពេលដែលទីក្រុង ឡាតាកៀ (Latakia) របស់ស៊ីរី បានទទួលរងការវាយប្រហារដោយមីស៊ីលជាច្រើនគ្រាប់ពីផ្ទៃសមុទ្រ។ រដ្ឋាភិបាលស៊ីរីបានចោទថា យន្តហោះចម្បាំងអ៊ីស្រាអែល គឺជាអ្នកបាញ់ទម្លាក់យន្តហោះនេះ ខណៈសហរដ្ឋអាមេរិកដែលបានបដិសេធថា មិនមានជាប់ពាក់ព័ន្ធនឹងការវាយប្រហារ ទៅលើទីក្រុងរបស់ស៊ីរីនោះបានចោទថា យន្តហោះយោធារបស់រុស្ស៊ី ត្រូវបានប្រព័ន្ធការពារដែនអាកាសស៊ីរី បានបាញ់ទម្លាក់ដោយយល់ច្រឡំ។
បន្ថែមពីលើនេះរដ្ឋាភិបាលទីក្រុងម៉ូស្គូវិញបានឲ្យដឹងថា ខ្លួនចាប់បានសញ្ញាបាញ់មីស៊ីល ចេញពីនាវាចម្បាំងមួយគ្រឿងរបស់បារាំង នៅលើផ្ទៃសមុទ្រមេឌីទែរ៉ាណេ នៅពេលយន្តហោះរបស់ខ្លួន បានបាត់ដានពីប្រព័ន្ធរ៉ាដា។
ងាកទៅខាងកងទ័ពរដ្ឋាភិបាលស៊ីរីវិញបានអះអាងថា មីស៊ីលចំនួន ២០គ្រាប់ ត្រូវបានបាញ់ចេញពីសមុទ្រ តម្រង់មកកាន់មូលដ្ឋានយោធាជាច្រើនកន្លែងនៅក្នុងខេត្ត ឡាតាកៀ (Latakia) កាលពីថ្ងៃចន្ទ ដោយបណ្ដាលឱ្យមនុស្ស ០៨នាក់រងរបួស ព្រមទាំងការខូចខាតក៏ដូចជាបង្កឱ្យដាច់ចរន្តអគ្គិសនី ដ៏សំខាន់នៅក្នុងទីក្រុងមួយនេះផងដែរ។ បើទោះជាមិនមានការបញ្ជាក់ថា ភាគីណាជាអ្នកនៅពីក្រោយការវាយប្រហារនេះក៏ដោយ ក៏ប៉ុន្តែប្រព័ន្ធផ្សព្វផ្សាយស៊ីរី បានចោទប្រកាន់លើអ៊ីស្រាអែល និងសហរដ្ឋអាមេរិក គឺជាអ្នកបើកការវាយប្រហារនេះ។
គួរជម្រាបថា យន្តហោះរុស្ស៊ីប្រភេទ Il-20 មានផ្ទុកយោធាចំនួន ១៤នាក់ បានដាច់ការទាក់ទង នៅពេលកំពុងធ្វើដំណើរនៅលើដែនសមុទ្រមេឌីទែរ៉ាណេ ដែលស្ថិតនៅចម្ងាយប្រហែល ៣៥គីឡូម៉ែត្រ ពីឆ្នេរសមុទ្រនៃប្រទេសស៊ីរី ដើម្បីវិលត្រឡប់ទៅកាន់មូលដ្ឋានយោធា ហាមៃមីម (Hmeymim) ដែលនៅទីនោះ។ ហេតុការណ៍នេះមិនទាន់មានការច្បាស់លាស់នោះឡើយថា នរណាខ្លះជាអ្នកប្រព្រឹត្តឡើង ខណៈភាគីស៊ីរី និងរុស្ស៊ី បានក្លាយជាជនរងគ្រោះដូចគ្នា៕
