(ម៉ានីល)៖ ព្យុះទីហ្វុង Mangkhat ដ៏មានឥទ្ធិពលខ្លាំងក្លានោះ បានបង្កការ​បំផ្លិចបំផ្លាញ​យ៉ាងធ្ងន់ធ្ងរដ៏ហេដ្ឋារចនា​សម្ព័ន្ធជារួម នៅចុងកោះធំ Luzon នៃភាគខាងជើង​ប្រទេសហ្វីលីពីន ខណៈចំនួនមនុស្ស​ស្លាប់​គិតត្រឹមរសៀល​ថ្ងៃអាទិត្យនេះ (ម៉ោងនៅទីក្រុងម៉ានីល) គឺមាន​រហូតដល់២៥នាក់ និង០២នាក់ទៀតបាត់ខ្លួន។ នេះបើតាមការ​ចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាព្រឹក​ថ្ងៃអាទិត្យ ទី១៦ ខែកញ្ញា ឆ្នាំ២០១៨។

ទីប្រឹក្សានយោបាយ​​នៃប្រធានាធិបតី​ហ្វីលីពីន គឺលោក Francis Tolentino បានថ្លែង​តាមកិច្ច​សម្ភាសន៍វិទ្យុ​​មួយថា ក្នុងចំណោមមនុស្ស​ស្លាប់​ទាំង ២៥នាក់នោះ គឺ ២០នាក់រស់នៅក្នុងតំបន់រដ្ឋបាល CAR និង ០៤នាក់ទៀតនៅខេត្ត Nueva Vizcaya និងម្នាក់​រស់នៅខេត្ត Ilocos នៃភាគខាងជើង​ប្រទេស​ហ្វីលីពីន។ ប្រជាជនហ្វីលីពីនយ៉ាង​ហោចណាស់ ២៥០,០០០នាក់ បានទទួលរងផល​ប៉ះពាល់ពីព្យុះ​មាំងឃុត។

គួរបញ្ជាក់ថា Mangkhut គឺជាព្យុះ​ខ្លាំងក្លាទី ១៥ ហើយដែលបាន​បោកបក់មកលើ​ប្រទេសហ្វីលីពីន​​នៅក្នុងឆ្នាំ២០១៨នេះ ហើយវាបច្ចុប្បន្ន​កម្លាំងរបស់វាកំពុងស្ថិតនៅក្នុង​សភាពខ្លាំងក្លា សំដៅទៅវាយប្រហារ​បណ្តាទីក្រុង និងខេត្តជាប់ឆ្នេរ​សមុទ្រភាគនិរតី និងខាងកើត​ប្រទេសចិត្តដូចជា ខេត្តហាយណាំ ក្វាងទុង ទីក្រុងហុងកុង និងទីក្រុងម៉ាកាវជាដើម ដោយបណ្តាតំបន់នេះ បានចេញសេចក្តីប្រកាស​អាសន្នកម្រិតកំពូលតែម្តង កាលពីព្រឹក​ថ្ងៃអាទិត្យនេះ​ ខណៈព្យុះ​មាំងឃុត បានបង្កើនល្បឿនដល់ ១១៨គីឡូម៉ែត្រ​ក្នុងមួយម៉ោង៕