(ពិភពលោក)៖ នៅថ្ងៃព្រហស្បតិ៍ ទី១៣ ខែកញ្ញា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ មន្ត្រីជាន់ខ្ពស់ម្នាក់មកពីក្រុមហ៊ុន Boeing បាននិយាយថា ចិនត្រូវបានគេរំពឹងថានឹងបញ្ជាទិញយន្ដហោះដឹកជញ្ជូនថ្មី ២០០គ្រឿង និងយន្ដហោះដឹកអ្នកដំណើរ ៤៧០គ្រឿង នៅរយៈពេល ២០ឆ្នាំ ខាងមុខទៀតនេះ៕
២៖ មនុស្ស១១នាក់បានស្លាប់ និង៤៤នាក់ទៀតរងរបួស បន្ទាប់ពីរថយន្តមួយគ្រឿងបើកបំបុកហ្វូងមនុស្សនៅឯឧទ្យានមួយ កន្លែងស្ថិតនៅភាគខាងត្បូង ប្រទេសចិន៕
៣៖ ខ្មាន់កាំភ្លើងដែលមិនទាន់ស្គាល់អត្តសញ្ញាណ បានធ្វើការបាញ់ប្រហារទៅលើមនុស្ស ០៥នាក់ នៅតំបន់បាឃឺសហ្វាល (Bakersfield) នៃភាគកណ្តាលរដ្ឋកាលីហ្វរញ៉ា សហរដ្ឋអាមេរិក និងមានចម្ងាយ ២០០គីឡូម៉ែត្រ ពីទីក្រុងឡូសអាន់ជែឡេស៕
៤៖ ទីប្រឹក្សារដ្ឋមីយ៉ាន់ម៉ាលោកស្រី អោងសាន ស៊ូជី បានគូសបញ្ជាក់ថា អ្នកសារព័ត៌មាន Reuters ពីរនាក់ដែលត្រូវបានកាត់ ទោសដាក់ពន្ធនាគារ ០៧ឆ្នាំ សម្រាប់ការស៊ើបអង្កេតលើការសម្លាប់រង្គាល ជនជាតិរ៉ូហ៊ីងយ៉ានៅក្នុងរដ្ឋរ៉ាឃីន (Rakhine) មិនមែនត្រូវបានផ្ដន្ទាទោសដោយសារតែពួកគេ ជាអ្នកសារព័ត៌មាននោះទេ តែគឺមកពីពួកគេរំលោភលើច្បាប់របស់មីយ៉ាន់ម៉ា៕
៥៖ យន្តហោះទម្លាក់គ្រាប់បែករុស្ស៊ីចំនួនពីរគ្រឿង ត្រូវបានយន្តហោះចម្បាំងអាមេរិកប្រភេទ F-22 ចាប់សញ្ញាបានថា បានធ្វើដំណើរមកក្បែររដ្ឋអាឡាស្កា ភាគឦសានសហរដ្ឋអាមេរិក៕
៦៖ ក្រុមហ៊ុន Apple នៅថ្ងៃពុធសប្ដាហ៍នេះ (ម៉ោងនៅអាមេរិក) បានបញ្ចេញទូរស័ព្ទដៃស្មាតហ្វូន iPhone X ដល់ទៅ៣ម៉ូឌែល ក្នុងនោះរួមមាន iPhones Xr, iPhoneXs និង iPhones XS Max៕
