(ឡាអេ)៖ តុលាការ​ព្រហ្មទណ្ឌអន្តរជាតិ (ICC) ដែលមានមូលដ្ឋាន​នៅទីក្រុងឡាអេ នៃប្រទេសហូឡង់​នោះ​បានប្រកាសថា ការស៊ើបអង្កេត​លើបទឧក្រិដ្ឋកម្មសង្គ្រាម​បង្កឡើងដោយ​សហរដ្ឋអាមេរិក នឹងនៅតែបន្តទៅ​មុខជានិច្ច ទោះបីជាមហាអំណាច​លេខ ១ លើពិភពលោក​មួយនេះ បាននិយាយគំរាមកំហែង​យ៉ាងធ្ងន់ធ្ងរ មកលើស្ថាប័ន​ស្វែងរកយុត្តិធម៌​របស់អន្តរជាតិ​មួយនេះ យ៉ាងណាក៏ដោយ។ នេះបើតាមការ​​ចេញផ្សាយ​ដោយ​សារព័ត៌មាន The Guardian នាល្ងាចថ្ងៃអង្គារ ទី១១ ខែកញ្ញា ឆ្នាំ២០១៨។

បន្ទាប់ពីទទួលបាន​ការព្រមានធ្ងន់ៗ​ដោយលោក ចន បូលតុន (John Bolton) ទីប្រឹក្សាសន្តិសុខជាតិ​សហរដ្ឋអាមេរិកនោះ នៅថ្ងៃអង្គារនេះ​តុលាការអន្តរជាតិ ICC បានចេញ​​សេចក្តីថ្លែងការណ៍​មួយ ដោយបញ្ជាក់ពី​ជំហរយ៉ាងខ្លី និងច្បាស់លាស់​របស់ខ្លួនថា «តុលាការ​នេះមិន​មានការភិតភ័យ ឬមួយក៏ត្រូវបានរារាំង នៅក្នុងការ​​បំពេញតួនាទី​​ជាលក្ខណៈសកល​ ​របស់ខ្លួននោះ​ឡើយ...»។

គួរបញ្ជាក់ថា នារយៈពេលប៉ុន្មានចុងក្រោយនេះ សហរដ្ឋអាមេរិកបានបង្ហាញកំហឹង​ក្រេវក្រោធយ៉ាងខ្លាំង ធ្វើឲ្យអន្តរជាតិមានការភ្ញាក់ផ្អើល ក៏ដោយសារតែតុលាការ​ព្រហ្មទណ្ឌអន្តរជាតិ ICC កំពុងតែព្យាយាមបើកការស៊ើបអង្កេត លើសំណុំរឿងចោទ​ប្រកាន់ថា សហរដ្ឋអាមេរិក​បានប្រព្រឹត្តបទ​ឧក្រិដ្ឋសង្រ្គាម​ នៅក្នុងប្រទេស​អាហ្វហ្គានីស្ថាន ដោយសហរដ្ឋអាមេរិក​​បានគំរាមជា​សាធារណៈថា នឹងចាប់ខ្លួន ព្រមទាំងដាក់​​ទណ្ឌកម្មលើចៅក្រម និងក្រុមមន្ត្រី​នៃតុលាការ​ព្រហ្មទណ្ឌ​អន្តរជាតិ ICC បើសិនជាតុលាការអន្តជាតិមួយនេះហ៊ានធ្វើផ្ទុយនឹងការព្រមាននេះមែន៕