(ហុងកុង)៖ សហស្ថាបនិក​​ និងជាប្រធាន​ក្រុមហ៊ុន Alibaba លោក ចេក ម៉ា (Jack Ma) នៅថ្ងៃចន្ទនេះ បាននិយាយថាលោកនឹង លាលែងពីដំណែងជាប្រធានក្រុមហ៊ុន Alibaba Group នៅថ្ងៃទី១០ ខែកញ្ញា ឆ្នាំ២០១៩។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃចន្ទ ទី១០ ខែកញ្ញា ឆ្នាំ២០១៨។

ជាមួយគ្នានោះ ក្រុមហ៊ុន Alibaba ក៏បានបញ្ជាក់ដែរថា នាយកប្រតិបត្តិ (​CEO) បច្ចុប្បន្នលោក Daniel Zhang នឹងត្រូវឡើងកាន់ តំណែងជាប្រធានក្រុមហ៊ុនជំនួសលោក ចេក ម៉ា។

គួរបញ្ជាក់ថា សារព័ត៌មានអាមេរិក New York Times កាលពីថ្ងៃសៅរ៍ បានរាយការណ៍ថា សហស្ថាបនិក​​នៃ​ក្រុមហ៊ុន Alibaba លោក ចេក ម៉ា គ្រោង​នឹង​ចូលនិវត្តពីក្រុមហ៊ុន​​​លក់​ទំនិញ​​​តាមអនឡាញ​ដ៏ធំសម្បើម​នៅប្រទេសចិន​នេះ នាថ្ងៃចន្ទដើមសប្តាហ៍នេះ ដើម្បីបង្វែរការយកចិត្តទុកដាក់​ទៅលើ​ការបង្កើតមូល​និធិ​សប្បុរសធម៌​ទាក់ទិននឹង​វិស័យ​អប់រំវិញ។

ក៏ប៉ុន្តែ ថ្លែងប្រាប់សារព័ត៌មាន South China Morning កាលពីថ្ងៃអាទិត្យ អ្នកនាំពាក្យក្រុមហ៊ុន Alibaba បានច្រានចោលការ អះអាងរបស់សារព័ត៌មានអាមេរិកមួយនេះ ដោយបញ្ជាក់ថា លោក ម៉ា នឹងបង្ហាញគំរោងស្ដីពីអ្នកបន្តវេនពីលោកនៅថ្ងៃចន្ទនេះ។

លោក ចេក ម៉ា ដែលនឹងឈាន​ចូលវ័យ ៥៤ឆ្នាំ នៅថ្ងៃចន្ទ​នេះ បានចាប់ផ្តើម​​ក្រុម​ហ៊ុន​ Alibaba ឡើងកាល​ពីឆ្នាំ១៩៩៩ ហើយ កសាងវា​ឲ្យក្លាយជាក្រុមហ៊ុន​​ផ្នែកបច្ចេកវិទ្យា​ដ៏ធំបំផុតមួយនៅ​លើពិភពលោក ដែលបាន​ជួយ​​ប្រែក្លាយ​របៀប ដែល​ប្រជាជនចិន​ទិញទំនិញ ​និងទូទាត់​ថវិកា​។

បច្ចុប្បន្ន​ក្រុមហ៊ុន Alibaba មាន​តម្លៃសរុប ​៤២០ពាន់លានដុល្លារ ហើយលោក Ma ​ដែល​ធ្លាប់​ជាគ្រូបង្រៀន​ភាសាអង់គ្លេស​ម្នាក់​ផង​ដែរ​​នោះ មានភាគហ៊ុន​៦.៤ភាគរយ​នៅក្នុងនោះ ដែល​ជាហេតុធ្វើឲ្យទ្រព្យសម្បត្តិ​របស់លោកមានតម្លៃ​ជាង ៤០ពាន់លានដុល្លារ និង​ក្លាយជា​អ្នកមាន​ស្តុកស្តម្ភ​ជាងគេ​បង្អស់​​នៅ​ក្នុងប្រទេស​​ចិន​៕