(ឡុងដ៍)៖ អង្គការលើកលែងទោសអន្តរជាតិ (Amnesty International) បានធ្វើការរិះគន់ធ្ងន់ៗលើសេចក្តីសម្រេចរបស់អាជ្ញាធរម៉ុលដូវ៉ា (Moldova ស្ថិតនៅចន្លោះរ៉ូម៉ានីនិងអ៊ុយក្រែន) ក្នុងការចាប់ឃុំឃាំងនិងបណ្ដេញជនជាតិតួកគីចេញពីប្រទេសខ្លួន និងចាត់ទុកថាវាជាសកម្មភាពប្រឆាំងនឹងប្រជាជនតួកគីដែលកំពុងរស់នៅក្នុងប្រទេសខ្លួន។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មាន Reuters នៅរសៀលថ្ងៃសៅរ៍ ទី០៨ ខែកញ្ញា ឆ្នាំ២០១៨។
អង្គភាពរក្សាសន្តិសុខជាតិម៉ុលដូវ៉ា បានឲ្យដឹងថាខ្លួនបានបណ្ដេញចេញនូវជនជាតិបរទេសចំនួន០៧ រូបដោយហេតុថាពួកគេនាំមកនូវការគំរាមកំហែងទៅដល់សន្តិសុខនៃប្រទេសខ្លួន តែមិនបាននិយាយបញ្ជាក់ថាអ្នកទាំងនោះជាជនជាតិអ្វីឡើយ។ អ្នកជាប់ពាក់ព័ន្ធនឹងជនជាប់ឃុំឃាំងខាងលើ បានបង្ហាញការសង្ស័យថា ទង្វើនេះគឺជាការធ្វើតាមបញ្ជារបស់រដ្ឋាភិបាលតួកគីប៉ុណ្ណោះ។ តែអាជ្ញាធរតួកគីពុំទាន់មានប្រតិកម្មអ្វីនៅឡើយទេ ជុំវិញការសង្ស័យនេះ។
ជនជាប់ឃុំឃាំងទាំងនោះ រួមមានគ្រូបង្រៀន និងបុគ្គលិកដែលបម្រើការនៅតាមសាលារៀន ដែលត្រូវបានសាងសង់ឡើងដោយចលនារបស់លោក Fethullah Gulen ដែលលោកសព្វថ្ងៃកំពុងជ្រកកោននៅសហរដ្ឋអាមេរិក និងជាជនដែលរដ្ឋាភិបាលតួកគីចោទថាជា មេខ្លោងពីក្រោយរដ្ឋប្រហារបរាជ័យកាលពីឆ្នាំ ២០១៦ កន្លងទៅ។
ប្រទេសតួកគីបាននិងកំពុងដាក់សម្ពាធទៅលើប្រទេសដទៃទៀត ដើម្បីបង្ខំឲ្យប្រទេសទាំងនោះព្រមធ្វើការនិរទេសជនណា ដែលមានទំនាក់ទំនងនឹងសាលារៀនដែលជាកិច្ចផ្តួចផ្តើមនិងទទួលការឧបត្ថម្ភពីចលនា Gulen។ រដ្ឋាភិបាលតួកគីបានហៅចលនានេះថា ជាក្រុមភេរវករ។
លោកស្រី Marie Struthers ដែលជានាយកអង្គការលើកលែងទោសអន្តរជាតិប្រចាំអឺរ៉ុបខាងកើត និងអាស៊ីកណ្តាល បាននិយាយថា «យើងមានក្តីបារម្ភយ៉ាងខ្លាំងពីជោគវាសនារបស់ជនជាតិតួកគីទាំង០៧រូបនោះ»។ លោកស្រីបានបន្ថែមថា «អាជ្ញាធរម៉ុលដូវ៉ា មិនត្រឹមតែរំលោភដល់សិទ្ធិមនុស្ស ដោយបណ្តេញជនបរទេសពីប្រទេសខ្លួននោះទេ តែថែមទាំងរំលោភសិទ្ធិមួយចំនួនទៀត ដូចជាការកាត់ក្តីប្រកបដោយភាពអយុត្តិធម៌ថែមទៀតផង»។
គ្រូបង្រៀនមួយរូបទៀតដែលត្រូវបានជាប់ឃុំឃាំង តែត្រូវបានដោះលែងវិញ បានបង្ហើបឲ្យដឹងថា «ពួកយើងពុំដឹងថាមានអ្វីកើតឡើងឲ្យពិតប្រាកដនោះទេ តែយើងគិតថានេះគឺជាបញ្ជាចេញពីតួកគីតែម្តង»។ មេធាវីមួយរូបឈ្មោះ Nick Frumos បាននិយាយថា លោកពុំដឹងថា ពួកគេទាំងនោះកំពុងស្ថិតនៅទីកន្លែងណាឡើយនាពេលនេះ។
អ្នកនាំពាក្យរបស់សភាម៉ុលដូវ៉ា បានចោទសួរជាចំហចំពោះសេចក្តីសម្រេច បណ្តេញគ្រូបង្រៀនទាំងនោះ ហើយក៏បានស្នើឲ្យមានការបំភ្លឺពីទីភ្នាក់ងាររក្សាសន្តិសុខជាតិផងដែរ។ ប្រធានាធិបតីម៉ុលដូវ៉ាលោក Igor Dodon បានធ្វើការច្រានចោលនូវការចុះផ្សាយនានាលើបណ្តាញសារព័ត៌មាន ដែលលើកឡើងថាការបណ្តេញជនជាតិតួកគីទាំងនោះ មានជាប់ពាក់ព័ន្ធទៅនឹងការផ្តល់ជំនួយចំនួន១០លានដុល្លារពីទីក្រុងអង់ការ៉ា ដើម្បីជួសជុលវិមានរបស់ប្រធានាធិបតីរបស់លោក នាពេលកន្លងមក។
វិមាននេះត្រូវបានគេបោះបង់ចោលតាំងពីឆ្នាំ២០០៩ ក្រោយពេលត្រូវបាតុករបានដុតបំផ្លាញ។ លោក Dodon បានអំពាវនាវទៅកាន់បណ្ដាញសារព័ត៌មានកុំឲ្យចេះតែមានមតិទៅលើការបណ្តេញជនជាតិតួកគីទាំងនោះឲ្យសោះ។ ចំណែកសេចក្តីថ្លែងការណ៍មួយចេញពីអង្គភាពរក្សាសន្តិសុខជាតិម៉ុលដូវ៉ា បានលើកឡើងថា «បន្ទាប់ពីទទួលបានព័ត៌មានបញ្ជាក់ពីកត្តាគំរាមកំហែងដល់សន្តិសុខជាតិ រួចមក សេចក្តីសម្រេចមួយក៏បានអនុវត្តដើម្បីបណ្តេញបុគ្គលទាំងនោះពីដែនដីរបស់ម៉ុលដូវ៉ាភ្លាមៗ»។
គួររំលឹកថាកាលពីខែមីនាកន្លងទៅនេះ រដ្ឋអាជ្ញាទទួលបន្ទុកការប្រឆាំងអំពើពុករលួយ បានសម្រេចឃុំឃាំង នាយកសាលាមួយកន្លែងដែលមានឈ្មោះថា Orizont ដើម្បីធ្វើការសាកសួរចម្លើយ។ ជនរូបនោះត្រូវបានដោះលែងវិញ និងបានព្យាយាមសុំសិទ្ធិជ្រកកោណនយោបាយនៅក្នុងប្រទេសម៉ុលដូវ៉ា តែត្រូវបានគេបដិសេធ។ ក្រោយមកលោក Orizont បានចាកចេញពីម៉ុលដូវ៉ា និងពុំដឹងជាទៅដល់ទីណាឡើយ៕
