(តូក្យូ)៖ ចំនួនមនុស្សស្លាប់ដោយសារគ្រោះរញ្ជួយដីកម្រិតធ្ងន់​ ដែលបានបង្កជាបំណាក់ដី​ នៅកោះហុកកៃដូ (Hokkaido) ភាគខាងជើង​ប្រទេសជប៉ុននោះ បានកើនដល់៣០នាក់ហើយ គិតត្រឹមថ្ងៃសៅរ៍នេះ ខណៈ​ក្រុមភ្នាក់ងារជួយសង្រ្គោះរាប់ម៉ឺននាក់ កំពុងខំស្វះ​ស្វែង​ហែល​​ឆ្លង​​​ឧបសគ្គ ដើម្បីតាមរុករក​អ្នកដែលអាចនៅរស់រានមានជីវិត។ នេះបើតាមការដកស្រង់ការផ្សាយចេញពីសារព័ត៌មាន Channel News Asia នៅរសៀលថ្ងៃសៅរ៍ ទី០៨ ខែកញ្ញា ឆ្នាំ២០១៨។

បើតាមការបញ្ជាក់ពីអាជ្ញាធរជប៉ុន ភាគច្រើននៃអ្នកស្លាប់គឺស្ថិតក្នុងទីក្រុងជនបទតូចមួយ​ឈ្មោះ Atsuma ជាតំបន់ដែល​លំនៅឋាន​នៅ​ក្បែរៗគ្នាជាច្រើនខ្នង ត្រូវបានជម្រាលភ្នំបាក់សង្កត់ពីលើ ដោយសារតែកម្លាំងរំញ័រនៃគ្រោះរញ្ជួយដី​​កម្រិត​៦.៧រ៉ិចទ័រ ដែលបានបន្សល់​ទុកស្លាកស្នាមនៃការបំផ្លិចបំផ្លាញយ៉ាងដំណំនៅទីនោះ។ ក្រៅពីនេះមនុស្ស០៩នាក់ នៅតែបន្តបាត់ខ្លួននៅក្រុង Atsuma ហើយ​ខ្ទង់​៤០០នាក់ទៀត បានរងរបួសស្រាល។

គួរជម្រាបថា ហេតុការណ៍រញ្ជួយដីខាងលើ បានកើតមានឡើង ខណៈដែល​តំបន់ភាគខាងលិចប្រទេសជប៉ុន ទើបតែទទួល​រង​គ្រោះពី​ការ​វាយ​លុកដោយព្យុះទីហ្វុងដ៏អាក្រក់ ដែលបានផ្តាច់ជីវិតមនុស្ស១១នាក់៕