(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានសម្តែងការអរគុណចំពោះ​ប្រមុខដឹកនាំកូរ៉េខាងជើង លោក គីម ជុងអ៊ុន ដែលបានបង្ហាញការបន្តជឿទុកចិត្ត​មកលើខ្លួន។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅយប់​ថ្ងៃ​ព្រហស្បតិ៍ ទី០៦ ខែកញ្ញា ឆ្នាំ២០១៨។

ការអរគុណរបស់លោក ត្រាំ ត្រូវបានធ្វើឡើងតាមការបង្ហោះសារនៅលើបណ្តាញសង្គម Twitter បន្ទាប់ពីក្នុងថ្ងៃដដែលនេះ ​​បេសកជន​ពិសេសកូរ៉េខាងត្បូង លោក Chung Eui-yong ដែលបានដឹកនាំប្រតិភូចូលជួបពិភាក្សា​ជាមួយលោក គិម ជុងអ៊ុន នៅព្យុងយ៉ាង កាលពី​ថ្ងៃពុធសប្តាហ៍នេះ បានឲ្យដឹងថា ​លោក គីម បានបង្ហាញពីទំនុកចិត្តឥតងាករេមកលើលោកប្រធានាធិបតីអាមេរិក និងមានបំណង​ចង់​​​សម្រេចដំណើរការលុបបំបាត់អាវុធនុយក្លេអ៊ែរ​ពីឧបទ្វីបកូរ៉េឲ្យបានទាំងស្រុង នៅមុនលោក ត្រាំ ផុតអាណត្តិថែមទៀតផង។

គួរជម្រាបថា ភាពតានតឹងក្នុងទំនាក់ទំនង​អាមេរិក-កូរ៉េខាងជើង បានថយចុះទៅវិញ នៅក្រោយកិច្ចប្រជុំកំពូលជាប្រវត្តិសាស្រ្ត​ រវាង​លោក ត្រាំ និងលោក គីម កាលពីខែមិថុនាកន្លងទៅ នៅសិង្ហបុរី ដោយនៅអំឡុងកិច្ចពិភាក្សាគ្នានោះ កូរ៉េខាងជើង បានបង្ហាញការ​ប្តេជ្ញាចិត្តដើម្បីបោះបង់ចោល​កម្មវិធីអភិវឌ្ឍន៍អាវុធនុយក្លេអ៊ែរ ខណៈ​សហរដ្ឋអាមេរិក បានសន្យាថានឹងផ្តល់​ការធានាសន្តិសុខដល់​​ទីក្រុងព្យុងយ៉ាង៕