(ម៉ូស្គូ)៖ ក្រសួងសុខាភិបាលរុស្ស៊ីបានឱ្យដឹងថា អ្នករងគ្រោះរបួសទាំងអស់នៅក្នុងហេតុការណ៍ យន្ដហោះដឹកអ្នកដំណើរមួយគ្រឿង រអិលចេញពីផ្លូវ និងឆាបឆេះបានទទួលព្យាបាលពិសេស ខណៈក្រុមក្រុមគ្រូពេទ្យ កំពុងតាមដានស្ថានភាពរបស់ពួកគេយ៉ាងយកចិត្តទុកដាក់។ នេះបើតាមការចេញផ្សាយដោយសារព័ត៌មាន Sputnik នៅរសៀលថ្ងៃសៅរ៍ ទី០១ ខែសីហា ឆ្នាំ២០១៨។
យោងតាមអាជ្ញាធររុស្ស៊ីនៅព្រឹកថ្ងៃសៅរ៍នេះ យន្ដហោះដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍ សាយប៊ែរៀន អ៊ែរឡាញ អូតៃ (Siberian airline Utair) បានរអិលចេញពីផ្លូវ នៅអំឡុងពេលចុះចតនៅឯអាកាសយានដ្ឋានក្នុងទីក្រុង Sochi ដោយបណ្ដាលឱ្យមានភ្លើងឆេះផងដែរ ប៉ុន្តែមិនមានអ្នកបាត់បង់ជីវិតនោះទេ។
ក្រសួងសុខាភិបាលរុស្ស៊ីបានឱ្យដឹងយ៉ាងដូច្នេះថា «នៅក្នុងចំណោមមនុស្ស ១៨នាក់ ដែលរងរបួសក្នុងនោះមានទាំងកុមារបីនាក់ បានទទួលការព្យាបាលពិសេស ហើយគ្មាននរណាម្នាក់បាត់បង់ជីវិតនោះទេ។ ពោលគឺអ្នកដំណើរទាំងអស់ ១៦០នាក់ ជិះនៅលើយន្ដហោះនេះត្រូវបានជម្លៀសដោយសុវត្ថិភាព»។
គួរជម្រាបថា កាលពីដំបូងឡើយអាជ្ញាធររុស្ស៊ីបានអះអាងថា មានមនុស្ស ០៦នាក់រងរបួស ហើយយន្ដហោះខាងលើមានផ្ទុកមនុស្ស ១៦៤នាក់ ក្នុងនោះមាន ០៦នាក់ជាអាកាសយាននិក៕
