(ន័រវេស)៖ គណៈកម្មាធិការពានរង្វាន់ណូបែល ក្នុងប្រទេសន័រវេស បាននិយាយថា របាយការណ៍ UN ស្ដីពីការប្រល័យពូជសាសន៍លើជនជាតិរ៉ូហ៊ីងយ៉ា នៅរដ្ឋរ៉ាឃីន (Rakhine) ប្រទេសមីយ៉ាន់ម៉ាមិនមានលក្ខណៈគ្រប់គ្រាន់ ដើម្បីឱ្យគណៈកម្មាធិការមួយនេះ ដកហូតពានរង្វាន់ណូបែលសន្តិភាពពីលោកស្រី អោង សានស៊ូជី នោះឡើយ។ នេះបើតាមការចេញផ្សាយដោយសារព័ត៌មាន Russian Today នៅព្រឹកថ្ងៃសៅរ៍ ទី០១ ខែកញ្ញា ឆ្នាំ២០១៨។
លោកស្រី អោងសាន ស៊ូជី បានទទួលពានរង្វាន់ណូបែលសន្តិភាពនៅក្នុងឆ្នាំ១៩៩១ សម្រាប់កិច្ចខិតខំប្រឹងប្រែងតស៊ូ ប្រឆាំងនឹងអតីតរបបដឹកនាំយោធាមីយ៉ាន់ម៉ា ដើម្បីសន្តិភាព អហិង្សា និងប្រជាធិបតេយ្យ ហើយលោកស្រីបានក្លាយជានិមិត្តរូបនៃ លិទ្ធិប្រជាធិបតេយ្យទំាងនៅលើឆាកអន្តរជាតិ និងនៅក្នុងប្រទេសមីយ៉ាន់ម៉ា។
ប៉ុន្តែបន្ទាប់ពីអំពើហិង្សានៅក្នុងរដ្ឋ Rakhine ផ្ទុះឡើងកាលពីខែសីហា ឆ្នាំ២០១៧ ដែលបណ្ដាលឱ្យជនជាតិដើមភាគតិចរ៉ូហ៊ីងយ៉ារាប់ពាន់នាក់បាត់បង់ជីវិត និងជាង ៧០០,០០០នាក់ រត់ភៀសខ្លួនទៅកាន់ប្រទេសបង់ក្លាដែស ប្រជាប្រិយភាពរបស់លោកស្រី ស៊ូជី បានធ្លាក់ចុះយ៉ាងគំហុកដោយថែម ទាំងមានខ្លះស្នើឱ្យគណៈកម្មាធិការពានរង្វាន់ណូបែល ដកហូតពានរង្វាន់ណូបែលសន្តិសភាពពីលោកស្រីទៀតផង។
លើសពីនេះទៅទៀត របាយការណ៍ UN ចេញផ្សាយកាលពីថ្ងៃចន្ទកន្លងទៅ ក៏បានថ្កោលទោសលោកស្រីផងដែរថា មិនបានប្រើប្រាស់តួនាទីជាទីប្រឹក្សារដ្ឋ ប្រឹងប្រែងដោះស្រាយវិបត្តិរ៉ូហ៊ីងយ៉ានោះទេ តែបែរជាគាំទ្រប្រតិបតិ្តការយោធារបស់កងទ័ពមីយ៉ាន់ម៉ា នៅក្នុងរដ្ឋ Rakhine ទៅវិញ។
តែទោះជាយ៉ាងនេះក្ដី គណៈកម្មាធិការពានរង្វាន់ណូបែល ក្នុងប្រទេសន័រវេស បាននិយាយថា របាយការណ៍ UN ស្ដីពីការប្រល័យពូជសាសន៍លើជនជាតិរ៉ូហ៊ីងយ៉ា នៅរដ្ឋ Rakhine ប្រទេសមីយ៉ាន់ម៉ាមិនមានលក្ខណៈគ្រប់គ្រាន់ ដើម្បីក្នុងការដកហូតពានរង្វាន់ ណូបែលសន្តិភាពពីលោកស្រី អោង សានស៊ូជី នោះទេ។
គណៈកម្មាធិការមួយនេះបានលើកឡើងដូច្នេះថា «វាពិតជាមានសារៈសំខាន់ណាស់ដែលត្រូវចងចាំថា ពាន់រង្វានណូប៊ែលសន្តិភាពមិនថា ផ្នែករូបវិទ្យា អក្សរសាស្ត្រ ឬសន្តិភាព គឺត្រួវបានផ្ដល់ជូនសម្រាប់កិច្ចខិតខំប្រឹងប្រែង និងសមិទ្ធិផលពីអតីតកាលប៉ុណ្ណោះ... ហើយការដកហូតពានរង្វាន់ណូបែលមកវិញ មិនស្ថិតនៅក្រោម ច្បាប់របស់គណៈកមា្មធិការណូបែលនោះឡើយ»។
គួរបញ្ជាក់ថា កាលពីថ្ងៃចន្ទក្រុមអ្នកស៊ើបអង្កេត UN បានចេញផ្សាយរបាយការណ៍មួយ ដោយចោទយោធាមីយ៉ាន់ម៉ាថា បានប្រព្រឹត្តអំពើប្រល័យពូជសាសន៍ប្រឆាំងនឹងជនជាតិរ៉ូហ៊ីងយ៉ា ហើយក៏បានថ្កោលទោសលោកស្រី ស៊ូជី ផងដែរសម្រាប់ភាពអសកម្ម ក្នុងការដោះស្រាយវិបត្តិមនុស្សជាតិនេះ។ ប៉ុន្តែរដ្ឋាភិបាល និងយោធាមីយ៉ាន់ម៉ា បានច្រានចោលការចោទប្រកាន់ ដោយមិនបានទទួលស្គាល់របាយការណ៍នេះទេ៕
