(ប៉េកាំង)៖ ប្រទេសចិននៅថ្ងៃពុធនេះ បានចេញមុខទាត់ចោលព័ត៌មានថា ខ្លួនគ្រោងបង្កើតមូលដ្ឋានទ័ពនៅប្រទេសអាហ្វហ្គានីស្ថាន ខណៈសារព័ត៌មានមួយនៅទីក្រុងហុងកុងបានចេញផ្សាយថា ចិនកំពុងកសាងជុំរុំយោធាសម្រាប់កងទ័ពអាហ្វហ្គានីស្ថាន ហើយក៏អាចបញ្ជូនកងទ័ពខ្លួន ទៅឈរជើងនៅទីនោះផងដែរ។ នេះបើតាមការចេញផ្សាយដោយ Channel News Asia ដកស្រង់ពីបណ្តាញ Reuters នាល្ងាចថ្ងៃពុធ ទី២៩ ខែសីហា ឆ្នាំ២០១៨។
ជុំវិញបញ្ហាខាងលើនេះ កាសែត South China Morning Post បានចេញផ្សាយកាលពីពេលថ្មីនេះថា ខ្លួនទទួលបានព័ត៌មានពីប្រភពដែលជិតស្និទ្ធនឹងមន្ត្រីយោធាចិន ហើយក្នុងនោះបានបញ្ជាក់ថា ចិនកំពុងតែកសាងជុំរុំយោធានៅតំបន់ Wakhan Corridor ដែលផ្សាភ្ជាប់ព្រំដែនរវាងប្រទេសចិន-អាហ្វហ្គានីស្ថានថែមទៀតផង។ តាមពិតទៅព័ត៌មានទាំងនេះ ក៏ត្រូវបានចិនបង្ហាញជាផ្លូវការផងដែរ កាលពីពេលកន្លងទៅ តាមរូបភាពជាការជួយកសាងមូលដ្ឋានយោធាសម្រាប់ប្រទេសអាហ្វហ្គានីស្ថាន។
ទោះបីជាបែបនេះក្តី អ្នកនាំពាក្យក្រសួងការបរទេសចិនលោកស្រី Hua Chunying បានច្រានចោលរាល់ការចេញព័ត៌មានខាងលើនេះ ដោយបញ្ជាក់យ៉ាងដូច្នេះថា «បន្ទាប់ពីបានពិនិត្យរឿងនេះ សេចក្តីរាយការណ៍ពាក់ព័ន្ធនានា គឺមិនមែនជាការពិតនោះទេ។ វាមិនអាចកើតមានឡើងទៅរួចនោះឡើយ នៅក្នុងការកសាងផង និងហ្វឹកហ្វឺនផងនៅក្នុងស្ថានភាពបែបនេះ»។ ការបញ្ជាក់បែបនេះ គឺលោកស្រី Hua ចង់សំដៅទៅលើការចោទប្រកាន់ថា ចិនកំពុងរៀបចំបញ្ជូនយោធារបស់ខ្លួនទៅកាន់ជុំរុំដែលកំពុងកសាង ក្នុងទឹកដីអាហ្វហ្គានីស្ថាននោះ។
គួរបញ្ជាក់ថា នេះមិនមែនជាលើកទីមួយឡើយ ដែលចិនរងការចោទប្រកាន់ថា កំពុងត្រៀមបញ្ជូនយោធាទៅឈរជើង នៅក្នុងមូលដ្ឋានដែលខ្លួនកំពុងសាងសង់ នៅព្រំដែនប្រទេសអាហ្វហ្គានីស្ថាន ប៉ុន្តែចិនតែងតែចេញមុខទាត់ចោលរាល់សេចក្តីថ្លែងការណ៍ និងព័ត៌មានពាក់ព័ន្ធដូចខាងលើនេះជានិច្ច៕
