(ពិភពលោក)៖ នៅថ្ងៃចន្ទ ទី២៧ ខែសីហា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ គ្រោះទឹកជំនន់យ៉ាងធ្ងន់ធ្ងរដែលបង្កឡើងដោយព្យុះទីហ្វុង និងព្យុះត្រូពិច នៅខេត្តសានទុង (Shandong) ភាគខាងកើតប្រទេសចិនបានផ្តាច់ជីវិតមនុស្ស ១៤នាក់ ហើយបង្កការខាតបង់ផ្នែកសេដ្ឋកិច្ចសម្រាប់ខែនេះប្រមាណ ១.៤៧ពាន់លានដុល្លារ៕
២៖ រដ្ឋមន្រ្តីការបរទេសអាល្លឺម៉ង់លោក ហៃកូ ម៉ាអាស (Heiko Maas) បានលើកឡើងថា អឺរ៉ុបគួរឲ្យគិតគូរវាយតម្លៃឡើងវិញទៅ លើភាពជាដៃគូជាមួយសហរដ្ឋអាមេរិក និងបានទទូចឲ្យអឺរ៉ុបរួមគ្នាបញ្ចេញប្រតិកម្ម ចំពោះគោលនយោបាយទាក់ទិនការដាក់ ទណ្ឌកម្មរបស់ទីក្រុងវ៉ាស៊ីនតោន ទៅលើប្រទេសរុស្ស៊ី ចិន តួកគី ក៏ដូចជាដៃគូសេដ្ឋកិច្ចសំខាន់ៗឯទៀតៗ៕
៣៖ ទីបំផុតអ្នកវិទ្យាសាស្រ្តអង់គ្លេសមួយក្រុមបានប្រកាសថា ពួកគេបានរកឃើញហើយថា តើ DNA របស់ដាយណូស័រមានលក្ខណៈពេញលេញបែបណានោះ៕
៤៖ មេដឹកនាំកំពូលមួយរូបរបស់ក្រុមភេរវករ ISIS នៅប្រទេសអាហ្វហ្គានីស្ថាន បានបាត់បង់ជីវិត នៅក្នុងការវាយប្រហារដោយមីស៊ីលរយៈចម្ងាយឆ្ងាយ របស់ក្រុមយោធាចម្រុះអន្តរជាតិដឹកនាំដោយសហរដ្ឋអាមេរិក ទៅលើសំបុក ISIS នៅខេត្តណាងហ្គាហា (Nangarhar) ភាគខាងកើតប្រទេស៕
៥៖ កូរ៉េខាងត្បូងនៅថ្ងៃចន្ទនេះបាននិយាយថា ការលុបចោលដំណើរទស្សនកិច្ចទៅកាន់កូរ៉េខាងជើង របស់រដ្ឋមន្ត្រីការបរទេសអាមេរិក លោក ម៉ៃក៍ ប៉ុមអូ អាចនឹងជះឥទ្ធិពលអវិជ្ជមានដល់គំរោងបង្កើត «ការិយាល័យទំនាក់ទំនងអន្តរកូរ៉េ» ដែលគ្រោងនឹងបើកនៅក្នុងខែសីហានេះ៕
៦៖ ប្រធានាធិបតីអាមេរិក លោក ដូណាល់ ត្រាំ ត្រូវគេរាយការណ៍ថា បានទាត់ចោលសេចក្តីថ្លែងការណ៍របស់ក្រុមមន្រ្តីសេតវិមាន ដែលមានបំណងចង់សម្តែងការកោតស្ញប់ស្ញែង ចំពោះស្នាដៃនានារបស់ព្រឹទ្ធសមាជិកអាមេរិក លោក ចន ម៉ាខេន (John McCain) ដែលទើបតែទទួលមរណភាព៕
