(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានចេញបញ្ជាឲ្យ​លុយជាង២០០លានដុល្លារ ដែលជាជំនួយសេដ្ឋកិច្ច​​​សម្រាប់តំបន់ Gaza និង West Bank របស់ប៉ាឡេស្ទីន បង្វែរទៅកាន់កន្លែងផ្សេងវិញ។ នេះបើតាមការដកស្រង់ការផ្សាយចេញពី​សារព័ត៌មានអង់គ្លេស BBC នៅព្រឹកថ្ងៃសៅរ៍ ទី២៥ ខែសីហា ឆ្នាំ២០១៨។

​មន្រ្តីនៃក្រសួងការបរទេសអាមេរិក បានឲ្យដឹងថា ការសម្រេចចិត្តរបស់លោក ត្រាំ ត្រូវបានធ្វើឡើង ក្រោយការត្រួតពិនិត្យ​ឡើងវិញ​យ៉ាងហ្មត់ចត់ ដើម្បីធានាថាមូលនិធិជំនួយទាំងនេះ ត្រូវយកទៅប្រើប្រាស់ ដោយស្របតាមផលប្រយោជន៍ជាតិ របស់សហរដ្ឋអាមេរិក​។ នាពេលកន្លងមកនេះ ទីក្រុងវ៉ាស៊ីនតោន ក៏បាន​ផ្អាកការផ្តល់ជំនួយ​ចំនួន៦៥លានដុល្លាររួចទៅហើយ ទៅកាន់ទីភ្នាក់ងារជួយសង្រ្គោះ​​របស់អង្គការសហប្រជាជាតិ សម្រាប់ជនជាតិប៉ាឡេស្ទីនផងដែរ។

គួរជម្រាបថា ទំនាក់ទំនងរវាងប៉ាឡេស្ទីន និងសហរដ្ឋអាមេរិក មិនបានជួបភាពល្អប្រសើរនោះឡើយ ចាប់តាំងតែពីលោក ដូណាល់ ត្រាំ បានឡើងកានអំណាចមក ហើយ​​វាបានធ្លាក់ចុះកាន់តែខ្លាំង បន្ទាប់ពីទីក្រុងវ៉ាស៊ីនតោន បានប្រកាសទទួលស្គាល់​ហ្សេរុយសាឡឹម​ជារដ្ឋធានីរបស់អ៊ីស្រាអែល កាលពីខែធ្នូ ឆ្នាំ២០១៧៕