(ពិភពលោក)៖ នៅថ្ងៃព្រហស្បតិ៍ ទី២៣ ខែសីហា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗជាច្រើនបានកើតឡើង រួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើ ព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖

១៖ វែបសាយឃ្លាំមើលកូរ៉េខាងជើង បានឲ្យដឹងថា ទីក្រុងព្យុងយ៉ាង ទំនងជាបានផ្អាកការកម្ទេច​​ទីតាំង​ធ្វើតេស្តមីស៊ីល​ផ្លោង​របស់​ខ្លួន៕

២៖ ព្យុះទីហ្វុងដ៏មានឥទ្ធិពល ត្រូវបានគេរាយការណ៍នៅថ្ងៃព្រហស្បតិ៍នេះថា បានធ្វើដំណើរឆ្ពោះទៅកាន់តំបន់ប៉ែកខាងលិច ប្រទេសជប៉ុន ជាទីដែលអាជ្ញាធរឧតុនិយមជប៉ុនព្រមានពីភ្លៀងធ្លាក់ខ្លាំង និងគ្រោះរអិលបាក់ដី ពិសេសគឺនៅក្នុងតំបន់ដែលទើបតែ រងគ្រោះដោយសារទឹកជំនន់ផ្ដាច់ជីវិតមនុស្សច្រើនជាង២០០នាក់ កាលពីខែកក្កដាកន្លងទៅ៕

 ៣៖ ចិននឹងបាញ់បង្ហោះគ្រាប់រ៉ុក្កែតដឹកជញ្ជូន​ទីមួយរបស់ខ្លួន ដែលផលិតដោយ​​ក្រុមហ៊ុនឯកជនចិន ក្នុងឆ្នាំនេះ៕

៤៖ សម្ព័ន្ធមិត្តចុងក្រោយនៅទ្វីបអាហ្វ្រិក​​របស់តៃវ៉ាន់ គឺ​ប្រទេសស្វាស៊ីឡង់ ដែលទើបប្តូរឈ្មោះមកថា ​«អេស្វាទីនី» នោះ បាន​ចេញមុខបញ្ជាក់ថា ខ្លួនពុំមានបំណងផ្លាស់ប្តូរ​​​ទៅបង្កើត​​ចំណងការទូត ជាមួយប្រទេសចិននោះឡើយ បន្ទាប់ពី​មន្រ្តីចិនម្នាក់ បាន​បង្ហាញ​ក្តីរំពឹងថា ​ប្រជាជាតិអាហ្រ្វិកនេះ នឹងបោះបង់តៃវ៉ាន់ចោលនាពេលឆាប់ៗជាក់ជាពុំខាន៕

៥៖ កងទ័ព​រដ្ឋាភិបាលស៊ីរីនៅខេត្តអ៊ីតលីប (Idlib) ភាគពាយ័ព្យប្រទេសបានបាញ់ទម្លាក់យន្តហោះដ្រូន​០៣គ្រឿង​​​របស់​ក្រុម​ឧទ្ទាម​​៕

៦៖ សេតវិមាន បានឱ្យដឹងថាប្រធានាធិបតីអាមេរិក លោក ដូណាល់ ត្រាំ បានជជែកគ្នាតាមទូរស័ព្ទ នៅថ្ងៃពុធសប្ដាហ៍ នេះ (ម៉ោងនៅសហរដ្ឋអាមេរិក) ជាមួយនាយករដ្ឋមន្ត្រីជប៉ុន លោកស៊ីនហ្សូ​ អាបេ ស្ដីពីកូរ៉េខាងជើង និងជំនួបរវាងអ្នកទាំងពីរនៅឯ មហាសន្និបាតអង្គការសហប្រជាជាតិ នៅខែកញ្ញាខាងមុខនេះ៕