(ញូដេលី)៖ យោធាឥណ្ឌា បានប្រកាសពីជោគជ័យនៃការធ្វើតេស្តមីស៊ីលកម្ទេចរថក្រោះ និងគ្រាប់បែកទំនើបប្រភេទ SAAW នៅឯរដ្ឋ Rajasthan ភាគខាងលិចប្រទេស។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅរសៀលថ្ងៃចន្ទ ទី២០ ខែសីហា ឆ្នាំ២០១៨។
បើតាមអ្នកនាំពាក្យរបស់ក្រសួងការពារជាតិឥណ្ឌា មីស៊ីលប្រដេញកម្ទេចរថក្រោះ HELINA ត្រូវបានធ្វើតេស្តដោយជោគជ័យទាំងទៅលើការហោះហើរ និងការកម្ទេចគោលដៅ ដោយមីស៊ីលនេះ ជាប្រភេទមីស៊ីលបាញ់ចេញពីឧទ្ធម្ភាគចក្រ។ ទន្ទឹមនឹងនេះ ការធ្វើតេស្តមួយទៀតនៃគ្រាប់បែកឆ្លាតវៃប្រភេទ SAAW ក៏ទទួលបានជោគជ័យដូចគ្នាផងដែរ។ អាវុធទំនើបៗទាំងពីរនេះសុទ្ធតែបានត្រូវអភិវឌ្ឍន៍ដោយក្រុមអ្នកជំនាញឥណ្ឌាផ្ទាល់។
គួរជម្រាបថា ក្នុងឱកាសនៃការធ្វើតេស្តសព្វាវុធនេះ រដ្ឋមន្រ្តីការពារឥណ្ឌាលោកស្រី Nirmala Sitharaman ក៏បានសម្តែងការសាទរ សម្រាប់កិច្ចប្រឹងប្រែងពង្រឹងសមត្ថភាពការពារជាតិនេះផងដែរ៕
