(ប៊ែរឡាំង)៖ អធិការបតីអាល្លឺម៉ង់ លោកស្រី អាន់ជែលឡា មើគែល និង​​ប្រធានាធិបតីរុស្ស៊ី លោក វ៉្លាឌីមៀ ពូទីន បានបើកកិច្ចពិភាក្សា​នៅឯទីក្រុងប៊ែរឡាំង ​នាថ្ងៃសៅរ៍សប្តាហ៍​នេះ ​ជាមួយប្រធានបទ​ទាក់ទិននឹង​បញ្ហាអន្តរជាតិសំខាន់ៗ រួមមានដូចជា ស៊ីរី អ៊ុយក្រែន អ៊ីរ៉ង់ និងគម្រោងភ្ជាប់បំពងផ្គត់ផ្គង់ឧស្ម័ន Nord Stream 2។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅ​រសៀលថ្ងៃអាទិត្យ ទី១៩ ខែសីហា ឆ្នាំ២០១៨។

កិច្ចប្រជុំពិភាក្សាខាងលើ ត្រូវបានធ្វើឡើង បន្ទាប់ពី​លោកស្រី មើគែល បានធ្វើដំណើរទស្សនកិច្ចនៅកាន់ទីក្រុងសូជី ប្រទេសរុស្ស៊ី កាល​ពីខែឧសភាកន្លងទៅ ហើយនៅមុនកិច្ចពិភាក្សារវាង​​មេដឹកនាំប្រទេសទាំងពីរចាប់ផ្តើម លោក ពូទីន និងលោកស្រី មើគែល បានធ្វើ​សន្និ​សីទសារព័ត៌មានរួមគ្នាមួយនៅវិមាន Schloss Meseberg ស្ថិតនៅជាយក្រុងប៊ែរឡាំង។

គួរជម្រាបថា ​បើតាមការបញ្ជាក់ពីថ្ងៃសុក្រ លោកស្រី មើគែល បានបង្ហើបថាកុំឲ្យមានការរំពឹងខ្ពស់ពេក ចំពោះលទ្ធផលនៃកិច្ចពិភាក្សា​​របស់លោកស្រី ជាមួយលោក ពូទីន ដោយវាគ្រាន់តែជាជំនួបការងារ ដែលពុំមានលទ្ធផលជាក់លាក់ណាមួយ ត្រូវរំពឹងថានឹងលេច​​ឡើងឡើយ៕