(​វ៉ាស៊ីនតោន)៖ អតីតអគ្គលេខាធិការអង្គការសហប្រជាជាតិ លោក Kofi Annan បានទទួលមរណភាពហើយ នៅថ្ងៃសៅរ៍នេះ ក្នុងវ័យ៨០ឆ្នាំ។ នេះបើតាមការចេញផ្សាយដោយសារព័ត៌មាន CNN​ នៅមុននេះបន្តិច នៅថ្ងៃសៅរ៍ ទី១៨ ខែសីហា ឆ្នាំ២០១៨។

ជាមួយគ្នានោះដែរ ថ្លែងនៅលើ Twitter ​អង្គការសហប្រជាជាតិបានបញ្ជាក់យ៉ាងខ្លីដូច្នេះថា៖« នៅថ្ងៃនេះយើងពិតមានការ
សោកស្ដាយជាទីបំផុត ដែលយើងបានបាត់បង់បុរស និងមេដឹកនាំដ៏អស្ចារ្យម្នាក់»។ លោក Kofi Annan កើតនៅប្រទេសហ្កាណា ក្នុងឆ្នាំ១៩៣៨ បានបម្រើការងារជាអគ្គលេខាធិការ UN​ទី០៧ ពីឆ្នាំ១៩៩៧ ដល់ឆ្នាំ២០០៦។ មិនតែប៉ុណ្ណោះ លោកក៏ធ្លាប់ជា សមាជិកអង្គការ The Elders ដែលជាអង្គការមួយធ្វើការងារពាក់ព័ន្ធនឹងសិទ្ធិមនុស្សចាប់តាំងពីបង្កើតឡើងក្នុងឆ្នាំ២០០៧ ហើយ លោកបានក្លាយជាប្រធានអង្គការនេះនៅឆ្នាំ២០១៣។

គួរបញ្ជាក់ថា លោក Kofi Annan មានកូនចំនួនបីនាក់។ អតីតអគ្គលេខាធិការ UN​ រូបនេះបានទទួលពានរង្វាន់ណូបែលសន្តិភាព កាលពីឆ្នាំ២០០១ សម្រាប់កិច្ចខិតខំប្រឹងប្រែងដើម្បីសន្តិភាពពិភពលោក៕