(ប៉េកាំង)៖ ក្រសួងការពារជាតិចិនបានចេញមុខទាត់ចោលរបាយការណ៍របស់សហរដ្ឋអាមេរិក ដែលបានអះអាងថា ចិនកំពុងហ្វឹក ហាត់យន្ដហោះទម្លាក់គ្រាប់បែកប្រឆាំងនឹងសហរដ្ឋអាមេរិក ក៏ដូចជាសម្ព័ន្ធមិត្តអាមេរិក ដោយចាត់ទុកថា របាយការណ៍នេះត្រូវបានប្រឌិតឡើងទាំងស្រុង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅព្រឹកថ្ងៃសៅរ៍ ទី១៨ ខែសីហា ឆ្នាំ២០១៨។
ប្រតិកម្មរបស់ទីក្រុងប៉េកាំង ធ្វើឡើងបន្ទាប់ពីមន្ទីរបញ្ចកោណបានចេញផ្សាយរបាយការណ៍ប្រចាំឆ្នាំមួយកាលពីថ្ងៃព្រហស្បតិ៍ ដោយនិយាយចំៗតែម្តងថា ចិនកំពុងពង្រីកឥទ្ធិពលនៅលើពិភពលោក ជាមួយការចំណាយកញ្ចប់ថវិកាយោធាកាលពីឆ្នាំ២០១៧ រហូតដល់ទៅជាង ១៩០ពាន់លានដុល្លារ។ មិនតែប៉ុណ្ណោះនៅក្នុងរបាយការណ៍នេះមន្ទីរបញ្ចកោណក៏បានបញ្ជាក់ថា ការធ្វើសមយុទ្ធយោធាយន្ដហោះទម្លាក់គ្រាប់បែករបស់យោធាចិន នារយៈពេលប៉ុន្មានឆ្នាំចុងក្រោយនេះ គឺជាការហ្វឹកហាត់ត្រៀមលក្ខណៈវាយប្រហារប្រឆាំងសហរដ្ឋអាមេរិក រួមទាំងសម្ព័ន្ធមិត្តអាមេរិក។
តែយ៉ាងណាក៏ដោយ នៅក្នុងសេចក្ដីថ្លែងការណ៍របស់ខ្លួន ដែលបានចេញផ្សាយនៅថ្ងៃសុក្រសប្ដាហ៍នេះ ក្រសួងការពារជាតិចិនបានចាត់ទុកថា របាយការណ៍របស់មន្ទីរបញ្ចកោណ គឺជាការប្រឌិតឡើងទាំងស្រុង និងជាការភ័ន្តច្រឡំពីចេតនានៃយុទ្ធសាស្ត្ររបស់ចិន។ «យោធា ចិនប្រឆាំងនឹងជាដាច់ខាតចំពោះរបាយការណ៍នេះ... ដ្បិតតាមការពិតការធ្វើទំនើបកម្មនៃយោធាចិន គឺមានបំណងការពារដែនអធិបតេយ្យភាព ផលប្រយោជន៍ រួមទាំងសន្តិភាព និងស្ថេរភាពរបស់ពិភពលោកតែប៉ុណ្ណោះ»។ នេះគឺជាគូសបញ្ជាក់របស់ ក្រសួងការពារជាតិចិន។
គួរបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ ចិនត្រូវបានគេរាយការណ៍ថា បានធ្វើសមយុទ្ធយន្ដហោះទម្លាក់គ្រាប់បែក នៅឯតំបន់សមុទ្រចិនខាងត្បូងជាបន្តបន្ទាប់។ ចំណែកឯ មន្ទីរបញ្ចកោណកាលពីខែមករាកន្លងទៅ ក៏បានចាត់ទុកផងដែរថា ទីក្រុងប៉េកាំង និងទីក្រុងម៉ូស្គូគឺជាការគំរាមកំហែងមួយដ៏ធំដល់សន្តិសុខជាតិអាមេរិក ព្រមទាំងសណ្ដាប់ធ្នាប់អន្តរជាតិ៕
