(ញូដេលី)៖ គ្រោះទឹកជំនន់នៅរដ្ឋខេរ៉ាឡា (Kerala) ដែលជាគោលដៅទេសចរណ៍ដ៏សំខាន់ នៅភាគខាងត្បូងប្រទេសឥណ្ឌា បានផ្តាច់ជីវិតមនុស្សសរុប៦៧នាក់ ខណៈជនរងគ្រោះជាង៥០,០០០នាក់ កំពុងស្វែងរកទីជ្រកកោណ នៅក្នុងជុំរំបណ្តោះអាសន្ន។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃព្រហស្បតិ៍ ទី១៦ ខែសីហា ឆ្នាំ២០១៨។
រដ្ឋ Kerala ដែលមានភាពល្បីល្បាញដោយទេសភាពឆ្នេរសមុទ្រដ៏ស្រស់ត្រកាល រួមជាមួយទិដ្ឋភាពនៃចម្ការតែនោះ បាននិងកំពុងរងការវាយលុកយ៉ាងដំណំពីការធ្លាក់ភ្លៀងជោគជាំខុសពីធម្មតា នារដូវវស្សាឆ្នាំនេះ ខណៈភូមិរាប់រយកន្លែង ត្រូវបានជន់លិច ហើយជើងហោះហើរចេញនិងចូលប្រចាំតំបន់ត្រូវបានផ្អែកថែមទៀត។
គួរជម្រាបថា ក្រៅពីនេះ កំណាត់ផ្លូវសរុបប្រវែងជាង១០,០០០គីឡូម៉ែត្រ ព្រមទាំងលំនៅឋានរាប់ពាន់ខ្នង ក៏ត្រូវបំផ្លិចបំផ្លាញទាំងស្រុងឬធ្វើឲ្យខូចខាត នៅទូទាំងរដ្ឋផងដែរ ខណៈអាជ្ញាធរក្នុងតំបន់បានចេញសេចក្តីប្រកាសអាសន្ន ដើម្បីឲ្យប្រជាជនមានការប្រុងយ័ត្នខ្ពស់ នៅចំពោះមុខការបន្តធ្លាក់ភ្លៀងកាន់តែខ្លាំងថែមទៀត៕
