(ម៉ូស្គូ)៖ ប្រព័ន្ធមីស៊ីលការពារដែនអាកាសរុស្ស៊ី នៅឯមូលដ្ឋានទ័ពអាកាស ហាមៃមីម (Hmeymim) ប្រទេសស៊ីរី បានបាញ់ទម្លាក់យន្ដហោះដ្រូនពីរគ្រឿងរបស់ក្រុមសកម្មប្រយុទ្ធ នៅក្នុងតំបន់កំពុងស្ថិតក្នុងប្រតិបត្តិការបន្ធូរបន្ថយជម្លោះនៃខេត្ត អ៊ីដលីប (Idlib)។ នេះបើតាមសម្តីលោក អាឡេចហ្សៃ តាស៊ីហ្គាន់កូវ (Alexei Tsygankov) ដកស្រង់ដោយសារព័ត៌មាន Sputnik នៅព្រឹកថ្ងៃចន្ទ ទី១៣ ខែសីហា ឆ្នាំ២០១៨។
លោក Alexei Tsygankov ជាប្រធានមជ្ឈមណ្ឌលរុស្ស៊ីសម្រាប់ការផ្សះផ្សាជាតិស៊ីរី បានបញ្ជាក់នៅក្នុងសន្និសីទសារព័ត៌មាន ដ៏ខ្លីមួយយ៉ាងដូច្នេះថា «ក្នុងរយៈពេល ២៤ម៉ោង ប្រព័ន្ធមីស៊ីលការពារដែនអាកាសរុស្ស៊ី នៅឯមូលដ្ឋានទ័ពអាកាស Hmeymim បានបាញ់ ទម្លាក់យន្ដហោះដ្រូនពីរគ្រឿង នៅក្នុងតំបន់បន្ធូរបន្ថយជម្លោះនៃខេត្ត Idlib គ្រប់គ្រងដោយក្រុមប្រដាប់អាវុធខុសច្បាប់»។
គួរបញ្ជាក់ថា បើតាមលោក Tsygankov ការបាញ់ទម្លាក់យន្ដហោះដ្រូនទាំងពីរខាងលើ មិនបានបង្កជាការខូចខាតអ្វីនោះទេ ប៉ុន្តែគេសង្កេតឃើញថា ឧប្បដិហេតុរបៀបនេះ ក៏ធ្លាប់បានកើតឡើងជាច្រើនលើកផងដែរកាលពីខែមិថុនា កន្លងទៅ ជាពិសេសគឺនៅអំឡុងខែមេសា និងខែឧសភា ឆ្នាំ២០១៨៕
