(តូក្យូ)៖ អាជ្ញាធរជប៉ុនបានបញ្ជាក់ឲ្យដឹងថា មនុស្សជិះនៅលើឧទ្ធម្ភាគចក្រនៃរដ្ឋបាលខេត្ត ហ្គាន់ម៉ា (Gunma) ទាំងអស់ចំនួន ០៩នាក់ បានស្លាប់បាត់បង់ជីវិតនៅក្នុងករណីធ្លាក់ ដែលកើតឡើងនៅតំបន់ភ្នំនៃខេត្តភាគកណ្តាលប្រទេសនេះ តាំងតែពីវេលាម៉ោង ១០៖០០នាទីព្រឹក ថ្ងៃសុក្រម្សិលមិញមកម្ល៉េះ ដោយកាលពីល្ងាចថ្ងៃដដែលនោះ មានសេចក្តីរាយការណ៍ថា សាកសពតែ ០២នាក់ ប៉ុណ្ណោះទើបត្រូវបានប្រទះឃើញ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាព្រឹកថ្ងៃសៅរ៍ ទី១១ ខែសីហា ឆ្នាំ២០១៨។
ប្រតិបត្តិការតាមរកឧទ្ធម្ភាគចក្រខាងលើនេះ ឈានមកទល់នឹងព្រឹកថ្ងៃសៅរ៍នេះ គឺត្រូវបានចូលរួមដោយកងកម្លាំងស្វ័យការពារជប៉ុនសរុប ១៦០នាក់ ហើយអាកាសយានិកដែលបានទទួលមរណភាពក្នុងករណីធ្លាក់នេះ គឺមានឈ្មោះថា នូរីយូគិ អាម៉ាហ្គៃ អាយុ ៥៧ឆ្នាំ ដែលលោកត្រូវបានគេអះអាងថា ធ្លាប់មានបទពិសោធន៍ហោះហើរជាយូរណាស់មកហើយ។
គួរបញ្ជាក់តាមសារព័ត៌មានក្នុងតំបន់ឲ្យដឹងថា ឧទ្ធម្ភាគចក្រមួយគ្រឿងប្រភេទ Bell 412EP ដែលត្រូវបានដាក់ឲ្យដំណើរការតាំងពីឆ្នាំ១៩៩៧ របស់រដ្ឋបាលខេត្ត Gunma បានបាត់ដំណឹងកាលពីវេលាម៉ោង ១០៖០០នាទីព្រឹកថ្ងៃសុក្រ ម៉ោងនៅទីក្រុងតូក្យូ ហើយមូលហេតុនៃការធ្លាក់នេះ កំពុងស្ថិតនៅក្នុងការស៊ើបអង្កេត ពីសំណាក់អ្នកជំនាញខេត្ត៕
