(តែលអាវីវ)៖ ក្រសួងការពារជាតិអ៊ីស្រាអែល បានឲ្យដឹងថ្ងៃព្រហស្បតិ៍នេះថា កងយន្តហោះចម្បាំងរបស់ខ្លួន បានបើកការវាយប្រហារយ៉ាងក្តៅគគុកទៅលើមូលដ្ឋានយោធាយុទ្ធសាស្រ្តរបស់ក្រុមហាម៉ាស់ជាង ១៤០កន្លែង នៅក្នុងតំបន់ហ្គាហ្សារបស់ប៉ាឡេស្ទីន។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅរសៀលថ្ងៃព្រហស្បតិ៍ ទី០៩ ខែសីហា ឆ្នាំ២០១៨។
ប្រតិបត្តិការវាយប្រហារតាមផ្លូវអាកាសនេះត្រូវបានអះអាងថា ធ្វើឡើងដើម្បីជាការតបតចំពោះការបាញ់ស្រោចគ្រាប់រ៉ុក្កែតប្រមាណ ១៥០គ្រាប់ ចេញពីហ្គាហ្សាចូលមកកាន់ទឹកដីអ៊ីស្រាអែលកាលពីយប់ថ្ងៃពុធ ក្នុងនោះប្រព័ន្ធខែលការពារ អាយរ៉ុន ដូម (Iron Dome) បាញ់ស្កាត់បាន ២៥គ្រាប់។
គួរជម្រាបថា បើតាមអ្នកនាំពាក្យសុខាភិបាលហ្គាហ្សា ជនស៊ីវិលមួយចំនួនបានបាត់បង់ជីវិត ដោយសារការវាយប្រហារយ៉ាងចាស់ដៃពីអ៊ីស្រាអែល ខណៈគ្រាប់រ៉ុក្កែតរបស់ពួកហាម៉ាស់ ដែលបានបាញ់ចូលអ៊ីស្រាអែល ភាគច្រើនធ្លាក់ចំទីវាល។ ការវាយប្រហារនេះ បានកើតមានឡើងតែមួយថ្ងៃប៉ុណ្ណោះ បន្ទាប់ពីអ៊ីស្រាអែលបានអះអាងថា សកម្មភាពចល័តសព្វាវុធកើតឡើងក្នុងទឹកដីហ្គាហ្សា៕
