(គែរ)៖ តុលាការឧក្រិដ្ឋកម្មនៃប្រទេសអេហ្ស៊ីប បានសម្រេចផ្តន្ទាទោសប្រហារជីវិតមនុស្ស ៤៥នាក់ ជុំវិញការសម្លាប់បុគ្គល ០៣រូប នៅក្នុងការផ្ទុះអំពើហិង្សាដោយអាវុធ នៅខេត្តអាហ្សង់ឌ្រា (Alexandria) ភាគខាងជើងប្រទេសកាលពី ០៦ឆ្នាំមុន។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃព្រហស្បតិ៍ ទី០៩ ខែសីហា ឆ្នាំ២០១៨។
មនុស្ស ០៤នាក់ ក្នុងនោះអ្នកត្រូវប្រហារជីវិតខាងលើ កំពុងស្ថិតក្រោមការឃុំឃាំង ខណៈ៤១នាក់ផ្សេងទៀត ត្រូវបានកាត់ទោសដោយកំបាំងមុខ។ សំណុំរឿងនេះ គឺបានកើតមានឡើងតាំងតែពីឆ្នាំ២០១២ មកម្ល៉េះ នៅពេលដែលអំពើហិង្សាដ៏ធំមួយ បានផ្ទុះឡើងរវាងក្រុមគ្រួសារពីបក្ស ដែលមានប្រើប្រាស់កាំបិត កាំភ្លើង និងដបភ្លើង រហូតបណ្តាលឲ្យមនុស្ស ០៣នាក់បាត់បង់ជីវិត។
គួរជម្រាបថា អំពើហិង្សាអាក្រក់ៗបានបន្តកើនឡើង នៅក្នុងប្រទេសអេហ្ស៊ីប ដោយសារតែរីកសាយភាយ នៃការប្រើប្រាស់កាំភ្លើង និងកាំបិត-ដាវដោយសេរី ជាពិសេសនៅតាមតំបន់ក្រីក្រអាណាធិបតេយ្យ និងដាច់ស្រយាល។ តួយ៉ាងកាលពីប៉ុន្មានថ្ងៃមុនមនុស្សបីនាក់បានស្លាប់ នៅក្នុងការបាញ់ប្រហារគ្នារវាងគ្រួសារចំនួនពីរដោយសារជម្លោះរឿងដីធ្លី នៅខេត្តញូវ៉ាល់ឡេ (New Valley) ភាគនិរតីអេហ្ស៊ីប៕
