(អូតតាវ៉ា)៖ នាយករដ្ឋមន្ត្រី​កាណាដា​លោក ចាស្ទីន ទ្រូដូ (Justin Trudeau) បានបញ្ជាក់​គោលជំហរថា រដ្ឋាភិបាលរបស់លោក​នឹងមិនចុះចាញ់​ឡើយក្នុង​ការពារសិទ្ធិ ហើយក៏នឹងមិនសូមទោស​អារ៉ាប៊ីសាអូឌីតដែរ សម្រាប់ការរិះគន់​លើបញ្ហាសិទ្ធិមនុស្ស​នៅក្នុងប្រទេសមួយ​នេះ។ នេះបើតាម​ការចេញផ្សាយ​ដោយ​សារព័ត៌មាន Channel News Asia​ នៅព្រឹកថ្ងៃព្រហស្បតិ៍ ទី០៩ ខែសីហា ឆ្នាំ២០១៨។

ភាពតានតឹង​រវាងកាណាដា និងអារ៉ាប៊ីសាអូឌីត ផ្ទុះឡើងខ្លាំងតាំង​តែពីថ្ងៃចន្ទមកម្លោះ ក្រោយពេល​ទីក្រុងរីយ៉ាដ ចាត់វិធានការលើ​ទីក្រុងអូតតាវ៉ា ក្នុងនោះរួមមាន​ទាំងការបណ្ដេញ​អគ្គរដ្ឋទូត ហៅទូតរបស់ខ្លួនមក​ស្រុកវិញ ផ្អាកកិច្ចព្រមព្រៀង​ពាណិជ្ជកម្ម និងវិនិយោគ។ មិនតែប៉ុណ្ណោះ អារ៉ាប៊ីសាអូឌីត​ក៏កំពុងរៀបចំបញ្ជូន​និស្សិត និងអ្នកជំងឺ​ជាពលរដ្ឋរបសខ្លួន​ចេញពីកាណាដា ទៅ​បណ្ដាប្រទេសដទៃផងដែរ។

តែទោះជាយ៉ាងនេះក្ដី នាយករដ្ឋមន្ត្រី​កាណាដា លោក Justin Trudeau នៅតែបង្ហាញពី​គោលជំហរម៉ឺងម៉ាត់​ដដែល​នៅថ្ងៃពុធ​សប្ដាហ៍នេះ។ លោក Trudeau បានគូសបញ្ជាក់យ៉ាងដូច្នេះថា «កាណាដា​នឹងបន្តនិយាយពីបញ្ហាសិទ្ធិមនុស្ស​ទាំងលក្ខណៈឯកជន និងជា​សាធារណៈ... ហើយពិតណាស់​យើងមិនចង់មានទំនាក់ទំនង​មិនល្អ ជាមួយ​អារ៉ាប៊ីសាអូឌីត​នោះទេ»។

គួរបញ្ជាក់ថា បើតាមលោក Trudeau រដ្ឋមន្ត្រីការបរទេស​កាណាដា លោកស្រី គ្រីស្ទា ហ្វ្រីឡេនដ៍ (Chrystia Freeland) បានធ្វើកិច្ចសន្ទនាជាមួយ​រដ្ឋមន្ត្រី​ការបរទេស​អារ៉ាប៊ីសាអូឌីត លោក អាប់ឌែល អាល់ ជូប៊ែរ (Adel al-Jubeir) កាលពីថ្ងៃអង្គារ ហើយកិច្ចសន្ទនានេះ​កំពុងបន្តធ្វើឡើង ដើម្បីព្យាយាម​ផ្សះផ្សាជម្លោះ​បច្ចុប្បន្ន៕