(ហារារ៉េ)៖ មេដឹកនាំចលនាប្រឆាំងមួយនៅប្រទេសហ្ស៊ីមបាវ៉េ ដែលមានឈ្មោះថា MDC គឺលោក ធិនដៃ ប៊ីទី (Tendai Biti) ត្រូវបានចាប់ខ្លួនហើយនៅថ្ងៃពុធនេះ នៅតំបន់ព្រំដែន ជីរ៉ាន់ឌូ (Chirundu) នៃប្រទេសអាហ្វ្រិកខាងត្បូងមួយនេះ ក្រោយពីលោកបានព្យាយាមរត់គេចខ្លួន ទៅកាន់ប្រទេសជិតខាងមួយគឺហ្សាំប៊ី (Zambia)។ នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នាល្ងាចថ្ងៃពុធ ទី០៨ ខែសីហា ឆ្នាំ២០១៨។
មេធាវីរបស់មេដឹកនាំក្រុមប្រឆាំងខាងលើនេះ ទើបតែបានបញ្ជាក់ប្រាប់អ្នកសារព័ត៌មាននៅក្នុងតំបន់ថា លោក Tendai ពិតជាត្រូវបានចាប់ និងឃុំខ្លួនពិតមែននៅតំបន់ព្រំដែនរវាងប្រទេសហ្ស៊ីមបាវ៉េ និងហ្សាំប៊ី។ ការចាប់ខ្លួនមេបក្សប្រឆាំងរូបនេះ គឺបានកើតមានឡើងក្រោយពីមេដឹកនាំចលនាប្រឆាំងប្រមាណ ០៨រូប ផ្សេងទៀត ត្រូវបានចាប់ខ្លួនកាលពីថ្ងៃចន្ទ ដែលពួកគេទាំងនេះត្រូវបានរដ្ឋាភិបាលហ្ស៊ីមបាវ៉េចោទប្រកាន់ថា មានជាប់ពាក់ព័ន្ធនឹងអំពើហិង្សានៅកណ្តាលរដ្ឋធានីហារារ៉េ (Harare) កាលពីសប្តាហ៍មុនដែលបានសម្លាប់មនុស្ស ០៦នាក់ និងបង្ករបួសមួយចំនួនទៀត។
គួរបញ្ជាក់ថា បន្ថែមពីការចាប់ខ្លួនមេចលនាប្រឆាំង ក្រុមជនសង្ស័យសរុប ២៧នាក់ ផ្សេងទៀតក៏ត្រូវបានចាប់ខ្លួនផងដែរ។ ក្រុមចលនាប្រឆាំង MDC បានប្រកាសជំទាស់ទៅនឹងលទ្ធផលបោះឆ្នោតកាលពីថ្ងៃទី៣០ ខែកក្កដា ដែលគណបក្សកាន់អំណាចរបស់ប្រធានាធិបតីបច្ចុប្បន្នរបស់លោកប្រធានាធិបតី អ៊ែមមឺសុន ម៉ាណាងហ្គាវ៉ា គឺជាអ្នកឈ្នះ៕
