(រីយ៉ាដ)៖ រដ្ឋាភិបាលអារ៉ាប៊ីសាអូឌីត បានឈានដល់ការលុបចោលរាល់កម្មវិធីព្យាបាលទាំងអស់ក្នុងប្រទេសកាណាដា និងកំពុងសម្របសម្រួលផ្ទេរអ្នកជំងឺជាជនជាតិអារ៉ាប៊ីសាអូឌីត ចេញពីប្រទេសក្នុងតំបន់អាមេរិកខាងជើងមួយនេះផងដែរ។ នេះបើតាមការចេញផ្សាយ ដោយទីភ្នាក់ងារសារព័ត៌មានចិនស៊ីនហួរ នៅរសៀលថ្ងៃពុធ ទី០៨ ខែសីហា ឆ្នាំ២០១៨។
ព័ត៌មានខាងលើត្រូវបានបញ្ជាក់ដោយ លោកវេជ្ជបណ្ឌិត ហ្វាដ ប៊ីន អ៊ីប្រាហ៊ីម អាល់ តាមីមី (Fahd bin Ibrahim Al Tamimi) ដែលជាមន្ត្រីសុខាភិបាលអារ៉ាប៊ីសាអូឌីតម្នាក់ទទួលបន្ទុកប្រចាំការនៅសហរដ្ឋអាមេរិក និងកាណាដា។ ម្យ៉ាងវិញទៀត ការសម្រេចចិត្តនេះទៀតសោត ធ្វើឡើងនៅចំពេលអារ៉ាប៊ីសាអូឌីត និងកាណាដា កំពុងមានជម្លោះការទូតនឹងគ្នា បន្ទាប់ពីទីក្រុងរីយ៉ាដបានសម្រេចចិត្តបណ្ដេញអគ្គរដ្ឋទូតកាណាដាចេញពីប្រទេស ព្រមទាំងផ្អាកកិច្ចព្រមព្រៀងពាណិជ្ជកម្មថ្មី លុបជើងហោះហើរ និងកម្មវិធីអាហារូបករណ៍ជាមួយកាណាដាទៀតផង។
គួរបញ្ជាក់ថា ជម្លោះការទូតរវាងកាណាដា និងអារ៉ាប៊ីសាអូឌីតបានផ្ទុះឡើងក្រោយរដ្ឋាភិបាលទីក្រុងអូតតាវ៉ា រិះគន់លើអាជ្ញាធរអារ៉ាប៊ីសាអូឌីត ជុំវិញការចាប់ខ្លួនសកម្មជនការពារសិទ្ធិមនុស្ស និងសិទ្ធិស្ត្រី ហើយដែលការរិះគន់នេះត្រូវបានទីក្រុងរីយ៉ាដចាត់ទុកថា ជាការលូកដៃចូលកិច្ចកិច្ចផ្ទៃក្នុងរបស់ខ្លួន៕
