(ហ្សាការតា)៖ អាជ្ញាធរ​ឥណ្ឌូណេស៊ី នៅថ្ងៃអង្គារនេះ បានឱ្យដឹងថា​ចំនួនអ្នកស្លាប់​បានកើនដល់១០៥នាក់ បន្ទាប់ពីគ្រោះរញ្ជួយដី កម្រិត ៧.០រ៉ិចទ័រ វាយប្រហារលើកោះទេសចរណ៍​ដ៏ល្បី លុមបុក (Lombok) ស្ថិតនៅភាគ​កណ្តាលនៃប្រទេសឥណ្ឌូណេស៊ី កាលពី​ថ្ងៃអាទិត្យកន្លងទៅ។ នេះបើតាមការចេញផ្សាយដោយទីភ្នាក់ងារ​សារព័ត៌មានចិនស៊ីនហួរ​ នៅថ្ងៃអង្គារ ទី០៧ ខែសីហា ឆ្នាំ២០១៨។

យោងតាមអាជ្ញាធរ​ឥណ្ឌូណេស៊ី​ មនុស្ស ២៣៦នាក់ទៀតបានរងរបួស ដោយសារតែគ្រោះ​រញ្ជួយកម្រិត ៧.០រ៉ិចទ័រនេះ ដែលបាន កើត​ឡើងតែមួយសប្ដាហ៍​ប៉ុណ្ណោះ ក្រោយគ្រោះ​រញ្ជួយដីមួយផ្សេងទៀតបានផ្ដាច់ជីវិត មនុស្ស១៦នាក់ នៅលើកោះ​លុមបុក (Lombok) ដដែលនេះ។ លើសពីនេះទៅទៀត អាជ្ញាធរឥណ្ឌូណេស៊ី បានបញ្ជាកដែរថា ភ្ញៀវទេសចរច្រើន​​​ជាង ៤,០០០នាក់ ត្រូវបានជម្លៀសខ្លួនចេញពីកោះ Gili ស្ថិតនៅក្បែរកោះលុមបុក ទៅកាន់កន្លែងមានសុវត្ថិភាព។  

គួរជម្រាបថា បើតាមទីភ្នាក់ងារ​ស្ទាបស្ទង់ភូមិសាស្រ្ត​អាមេរិក USGS គ្រោះរញ្ជួយផែនដី​ខាងលើ​មានឥទ្ធិពល ​៧.០​រ៉ិចទ័រ និងមាន ជម្រៅ​ ១០គីឡូម៉ែត្រ​ក្រោមផ្ទៃដី។ គ្រោះរញ្ជួយដី​​តែងកើត​មានឡើង​ជាញឹកញាប់ នៅប្រទេស​អាស៊ានមួយនេះ គឺដោយសារតែ​ឥណ្ឌូណេស៊ី មានទីតាំងភូមិសាស្រ្ត ស្ថិត​​នៅចំពីលើតំបន់ខ្សែ​ក្រវាត់ភ្នំភ្លើង​ ដែលគេហៅថា Pacific Ring of Fire ដែលមាន សណ្ឋានដីងាយរងគ្រោះធម្មជាតិ​ខ្លាំងជាងគេ​លើផែនដីដូចជា រញ្ជួយដី បន្ទុះភ្នំភ្លើង និងរលកយក្សស៊ូណាមិជាដើម៕