(ពិភពលោក)៖ នៅថ្ងៃព្រហស្បតិ៍ ទី០២ ខែសីហា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើ ព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ អនុប្រធានាធិបតីអាមេរិកលោក ម៉ៃក៍ ផែន (Mike Pence) បានទទួលស្វាគមន៍ការវិលត្រឡប់មកវិញ នៃអដ្ឋិធាតុរបស់កងទ័ពអាមេរិក ដែលបានពលជីវិតកាលពីសម័យសង្រ្គាមកូរ៉េ ក្នុងពិធីមួយដែលប្រព្រឹត្តទៅនៅលើកោះហាវ៉ៃនាថ្ងៃពុធសប្តាហ៍នេះ (ពេលវេលានៅអាមេរិក)៕
២៖ រដ្ឋាភិបាលកូរ៉េខាងត្បូង នៅថ្ងៃព្រហស្បតិ៍នេះបានឱ្យដឹងថា ខ្លួនបានបញ្ជូននាវាចម្បាំងមួយគ្រឿងទៅកាន់ប្រទេសលីប៊ី ដែល ជាការបង្ហាញចេតនាចង់បង្ហាញកម្លាំងសាច់ដុំ ដើម្បីធានាឱ្យមានការដោះលែងជនជាតិកូរ៉េខាងត្បូងម្នាក់ ដែលត្រូវបានគេចាប់ ពង្រត់ ជាមួយជនជាតិហ្វីលីពីនបីនាក់ផ្សេងទៀត នៅក្នុងប្រទេសអាហ្វិ្រកខាងជើងមួយនេះ៕
៣៖ មន្រ្តីរដ្ឋាភិបាលក្រុងវ៉ាស៊ីតោនបានឲ្យដឹងថា សហរដ្ឋអាមេរិក អាចនឹងបង្កើនអត្រាយកពន្ធ ចំពោះទំនិញនាំចូលពីចិនបន្ថែម ទៀត ពីលើគំរោងបន្ថែមពន្ធស្រាប់ក្នុងទំហំប្រមាណ២០០ពាន់លានដុល្លារ ដែលខ្លួនបានគ្រោងទុករួចជាស្រេច ខណៈសហរដ្ឋអាមេរិកកំពុងបន្តការដាក់សម្ពាធទីក្រុងប៉េកាំង ឲ្យធ្វើការផ្លាស់ប្តូររបៀបធ្វើពាណិជ្ជកម្ម៕
៤៖ នាយករដ្ឋមន្ត្រីអ៊ីស្រាអែលលោក បិនចាមីន ណឺតាន់យ៉ាហ៊ូ (Benjamin Netanyahu) បានព្រមានជាសាធារណៈថា អ៊ីស្រាអែលនឹងប្រើប្រាស់កម្លាំងយោធាជាវិធានការឆ្លើយតប បើសិនជាកងទ័ពអ៊ីរ៉ង់ចូលមកក្បែរ ឬក៏ព្យាយាមបិទច្រកសមុទ្រ បាប់អាល់មែនឌែប (Bab al-Mandeb) ដែលភ្ជាប់សមុទ្រក្រហមទៅកាន់ឈូងសមុទ្រអាដិន (Aden) នោះ៕
៥៖ អ្នកវិទ្យសាស្រ្តបានលើកឡើងមធ្យោបាយថ្មីមួយ ដើម្បីស្វែងរកជីវិតនៅក្រៅប្រព័ន្ធព្រះអាទិត្យ ខណៈដែលមធ្យោបាយជា ច្រើនទៀត ជាពិសេសគឺការដំណើរការកែវយឺតអវកាស កំពុងតែអនុវត្តន៍យ៉ាងខ្លាំងក្លាបំផុត៕
៦៖ សេតវិមានបានចេញមុខទទួលស្គាល់ថា រដ្ឋាភិបាលឥណ្ឌាបានអញ្ចើញប្រធានាធិបតីអាមេរិកលោក ដូណាល់ ត្រាំ ឲ្យទៅបំពេញទស្សនកិច្ចនៅឯប្រជាជាតិអាស៊ីខាងត្បូងមួយនេះ ប៉ុន្តែការសម្រេចចិត្តចុងក្រោយ ពុំទាន់ត្រូវបានធ្វើឡើងនៅឡើយទេ៕
