(ប៉េកាំង)៖ សារព័ត៌មានរដ្ឋចិន China Daily នៅថ្ងៃចន្ទនេះបានរាយការណ៍ថា ឧទ្ធម្ភាគចក្រមួយគ្រឿងបានធ្លាក់នៅក្បែរស្ពានមួយកន្លែង ស្ថិតនៅភាគខាងជើងទីក្រុងប៉េកាំងនៅម៉ោង ១១៖០០នាទីព្រឹកមិញនេះ។ នេះបើតាមការចេញផ្សាយបន្តដោយសារព័ត៌មាន Sputnik នៅល្ងាចថ្ងៃចន្ទ ទី៣០ ខែកក្កដា ឆ្នាំ២០១៨។
យោងតាម China Daily ក្រុមអ្នកជួយសង្រ្គោះ និងក្រុមពន្លត់អគ្គិភ័យបានធ្វើដំណើរទៅកាន់កន្លែងកើតហេតុភ្លាមៗ ខណៈ មូលហេតុធ្លាក់កំពុងស្ថិតនៅក្រោមការស៊ើបអង្កេត។ ដោយឡែកមនុស្ស ០៤នាក់ ដែលជិះនៅលើឧទ្ធម្ភាគចក្រ Bell 429 របស់ក្រុមហ៊ុន Reignwood Star Aviation បានរងរបួស និងត្រូវបញ្ជូនទៅកាន់មន្ទីរពេទ្យភ្លាម។
គួររំលឹកថា កាលពីខែមិថុនា ឧទ្ធម្ភាគចក្រជួយសង្រ្គោះមួយគ្រឿងបានធ្លាក់នៅឯទីក្រុង Kunming នៃខេត្ត Yunnan ភាគនិរតីប្រទេសចិន បានផ្ដាច់ជីវិតមនុស្ស ០៣នាក់៕
