(ឡូសអាន់ជែលឡែស)៖ អភិបាលរដ្ឋកាលីហ្វរញ៉ាលោក ជែរី ប្រោន (Jerry Brown) បានប្រកាសដាក់តំបន់ចំនួនពីររបស់រដ្ឋ ទៅក្នុងគ្រាអាសន្ន (State of Emergency) នៅភាគខាងត្បូងកាលីហ្វរញ៉ា ដោយសារតែការរីករាលដាលយ៉ាងឆាប់រហ័ស នៃគ្រោះមហន្តរាយភ្លើងឆេះព្រៃ ក្នុងរដ្ឋភាគខាងលិចរបស់សហរដ្ឋអាមេរិកមួយនេះ។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសុក្រ ទី២៧ ខែកក្កដា ឆ្នាំ២០១៨។
តំបន់ដែលត្រូវលោក Brown ដាក់ក្រោមគ្រាអាសន្នរួមមាន រីវើសាយដ៍ (Riverside) និង ហ្សាស្តា (Shasta) ដោយសារតែឥទ្ធិពលនៃភ្លើងឆេះព្រៃ ដែលគេដាក់ឈ្មោះឲ្យថា ក្រេនស្តុន (Cranston) និងខារ (Carr) ដែលបានដុតបំផ្លាញលំនៅឋាន និងសំណង់អគារផ្សេងជាច្រើនខ្នង ព្រមទាំងបង្កការគំរាមកំហែងដល់ប្រព័ន្ធហេដ្ឋារចនាសម្ព័ន្ធសំខាន់ៗ និងបង្ខំឲ្យមានការជម្លៀសមនុស្សថែមទៀត។
គួរជម្រាបថា ភ្លើងឆេះព្រៃ Cranston បានកើតឡើងកាលពីរសៀលថ្ងៃពុធសប្តាហ៍នេះ (ពេលវេលានៅភាគខាងលិចអាមេរិក) នៅជួរភ្នំ សាន់ហ្សាស៊ីនតូ (San Jacinto) ក្នុងតំបន់ Riverside ចម្ងាយប្រហែល ១៤៤គីឡូម៉ែត្រ ភាគខាងកើតក្រុងឡូសអាន់ជែលឡែស (Los Angeles) និងបានឆាបឆេះផ្ទៃដីទំហំជិត ២,០០០ហិកតា ហើយមកទល់ពេលនេះមានការពន្លត់ទប់ស្កាត់មិនដល់ ១០ភាគរយឡើយ។ ជាមួយគ្នានេះ ប្រជាជនអាមេរិកក្នុងតំបន់យ៉ាងតិច ៣,០០០នាក់ ត្រូវបានជម្លៀសខ្លួនចេញពីលំនៅឋានប្រមាណជាង ២,០០០ខ្នង។
ចំណែកឯភ្លើងឆេះព្រៃ Carr បានឆាបឆេះផ្ទៃដីទំហំជិត ៩,០០០ហិកតា កាលពីថ្ងៃព្រហស្បតិ៍សប្តាហ៍នេះនៅតំបន់ Shasta ហើយត្រូវបានក្រុមភ្នាក់ងារពន្លត់អគ្គីភ័យទប់ស្កាត់បានត្រឹម ១០ភាគរយប៉ុណ្ណោះ។ បើតាមលោក Brown កម្រិតសីតុណ្ហភាពក្តៅខ្លាំង បូករួមជាមួយភាពហួតហែង និងខ្យល់បក់ខុសប្រក្រតី បានកាន់តែធ្វើឲ្យមហន្តរាយភ្លើងឆេះព្រៃនេះ រីករាតត្បាតឡើងយ៉ាងខ្លាំងថែមទៀត៕
