(ប៊ែរឡាំង)៖ បុរសជនជាតិវៀតណាមម្នាក់ត្រូវបានតុលាការសហព័ន្ធអាល្លឺម៉ង់ ផ្ដន្ទាទោសដាក់ពន្ធនាគារ ០៤ឆ្នាំ ពីបទចូលរួមក្នុងសកម្មភាពចាប់ពង្រត់អ្នកជំនួញវៀតណាមម្នាក់ នៅលើដងផ្លូវក្នុងទីក្រុងប៊ែរឡាំង កាលពីខែកក្កដា ឆ្នាំ២០១៧។ នេះបើតាមការចេញផ្សាយដោយសារព័ត៌មាន BBC នៅព្រឹកថ្ងៃព្រហស្បតិ៍ ទី២៦ ខែកក្កដា ឆ្នាំ២០១៨។
តុលាការទីក្រុងប៊ែរឡាំង បានចេញសាលក្រមកាត់ទោសបុរសវៀតណាមម្នាក់ ដែលត្រូវបានគេកំណត់អត្តសញ្ញាណត្រឹមតែឈ្មោះ ឡុង (Long NH) មានអាយុ ៤៧ឆ្នាំ សម្រាប់ការចូលរួមក្នុងសកម្មភាព ជាមួយទីភ្នាក់ងារស៊ើបការណ៍សំងាត់វៀតណាម និងឱ្យគេជួលរថយន្ដ ប្រើប្រាស់ក្នុងការចាប់ពង្រត់លោក ទ្រិញ ហ្សួនថាញ់ (Trinh Xuan Thanh) ជាអតីតនាយកប្រតិបត្តិក្រុមហ៊ុនប្រេងរដ្ឋវៀតណាម។
លោក Xuan Thanh ដែលមានបំណងស្នើសុំសិទ្ធជ្រកកោន ក្នុងប្រទេសអាល្លឺម៉ង់ ត្រូវបានគេចាប់ពង្រត់ចូលក្នុងរថយន្ដមួយគ្រឿង នៅឯឧទ្យានក្នុងទីក្រុងប៊ែរឡាំង ធាហ្គាឌែន (Tiergarten) កាលពីថ្ងៃទី២៣ ខែកក្កដា ឆ្នាំ២០១៧ ហើយបន្ទាប់មកទើបលេចលឺដំណឹងថា រូបលោកត្រូវគេបញ្ជូនត្រឡប់ទៅកាន់វៀតណាមវិញ ព្រមទាំងត្រូវគេកាត់ទោសដាក់ពន្ធនាគារអស់មួយជីវិត ពីបទពុករលួយប្រាក់រដ្ឋជាង ១៥០លានដុល្លារ របស់ក្រុមហ៊ុនប្រេងរដ្ឋ PetroVietnam។
គួរបញ្ជាក់ថា បើតាមអាជ្ញាធរអាល្លឺម៉ង់ បុរសឈ្មោះ Long NH បានសារភាពពីទោសកំហុសរបស់ខ្លួន ដើម្បីទទួលបានការបន្ធូរបន្ថយទោស។ រីឯតុលាការអាល្លឺម៉ង់ក៏បានអះអាងដែរថា បុរសរូបនេះ មិនមានជាប់ពាក់ព័ន្ធនឹងសកម្មភាពកម្រិតខ្ពស់ ក្នុងការរៀបចំគំរោង និងអនុវត្តន៍សកម្មភាពចាប់ពង្រត់លោក Xuan Thanh នោះទេ៕
