​(ដាម៉ាស់)៖ ចំនួនមនុស្សស្លាប់នៅ​ក្នុងការវាយប្រហារ​ដោយបំផ្ទុះគ្រាប់បែក​អត្តឃាត​ដ៏អាក្រក់មួយ នៅឯភាគ​ខាងត្បូង​ប្រទេសស៊ីរី​ កាលពី​ថ្ងៃពុធម្សិលមិញនេះ បានកើនដល់ ២២៥នាក់ហើយ ក្នុងនោះ ១២៧នាក់​គឺជាប្រជាជនស្លូតត្រង់។ នេះបើ​​តាមអង្គការ​ឃ្លាំមើល​សិទ្ធិ​មនុស្សស៊ីរី​ដកស្រង់​ដោយ​​សារព័ត៌មាន BBC​ នៅព្រឹកថ្ងៃព្រហស្បតិ៍ ទី២៦ ខែកក្កដា ឆ្នាំ២០១៨។

អង្គការឃ្លាំ​មើល​សិទ្ធិ​មនុស្សស៊ីរី​បានឱ្យដឹងថា ការវាយប្រហារ​នេះ​​បានកើតឡើង​ក្បែរផ្សារ​ដ៏មមាញឹក​មួយ​កន្លែង​ក្នុងទីក្រុង ស្វេដា (Sweida) ស្ថិតក្រោមការ​គ្រប់គ្រងដោយ​​រដ្ឋាភិបាលស៊ីរី នៃភាគខាងត្បូងប្រទេស។ អង្គការមួយនេះ​ក៏បានអះអាងដែរថា មនុស្ស​សរុប ១៨០នាក់ផ្សេងទៀតរងរបួស រីឯក្រុម ISIS ក៏បានអះអាងផងដែរថា ខ្លួនជាអ្នកដឹកនាំការវាយប្រហារដ៏អាក្រក់នេះ។

គួរបញ្ជាក់ថា បច្ចប្បន្នកងកម្លាំង​រដ្ឋាភិបាលស៊ីរី ដោយមានការគាំទ្រ​ពីយន្ដហោះចម្បាំង​រុស្ស៊ី បានវាយដណ្ដើមយក​ទឹកមកវិញស្ទើរ តែទាំងស្រុង​ពីក្រុម ISIS និងក្រុម​ឧទ្ទាមស៊ីរី​គាំទ្រដោយក្រុមចំរុះសហរដ្ឋអាមេរិក។ ក៏ប៉ុន្តែ​ការវាយប្រហារ​ដោយបំផ្ទុះគ្រាប់បែក នៅតែបន្តកើតមាន​ឡើង​ជារឿយៗ ខណៈមនុស្ស ២៧០,០០០នាក់ បានរត់ភៀសខ្លួន​ចេញពីសម្បែង​ នៅក្នុងតំបន់​ដែលជម្លោះ​កំពុងកើតមាន ជាពិសេស​គឺទីក្រុង ឌែរ៉ាអា (Deraa) ស្ថិតនៅភាគខាងលិច​ទីក្រុង​ស្វេដា៕