(ប៉ាគីស្ថាន)៖ ក្រុមមន្ត្រីប៉ាគីស្ថាននៅថ្ងៃពុធនេះបានបញ្ជាក់ថា មនុស្សយ៉ាង​ហោច​ណាស់ ២៤នាក់ ក្នុងនោះមានប៉ូលិស ០២នាក់បានស្លាប់ និងជាច្រើននាក់​រងរបួសនៅក្នុង​ការវាយប្រហារបំផ្ទុះ​គ្រាប់បែក នៅក្បែរការិយាល័យ​បោះឆ្នោតក្នុងទីក្រុងខ្វេតតា (Quetta) នៃខេត្ត Baluchistan។ នេះបើតាមការចេញផ្សាយដោយសារព័ត៌មាន Al Jazeera នៅថ្ងៃពុធ ទី២៥ ខែកក្កដា ឆ្នាំ២០១៨។

អ្នកនាំពាក្យមន្ទីរ​ពេទ្យក្នុង​ទីក្រុង Quetta បានប្រាប់ Al Jazeera ថា​មនុស្ស ២៨នាក់ ក៏បានរងរបួស​ផងដែរ ហើយការវាយប្រហារផ្ទុះ​គ្រាប់បែកនេះ​ទៀតសោត កើតនៅចំថ្ងៃដែល​ប្រជាជនប៉ាគីស្ថាន នំាគ្នា​ទៅបោះឆ្នោតជ្រើសរើសមេដឹកនាំ​រដ្ឋាភិបាល​ថ្មី។ ប៉ុន្តែព្រមពេល​ជាមួយគ្នា គេមិនទាន់ដឹងច្បាស់​នៅឡើយទេថា ការបោះឆ្នោតត្រូវផ្អាក ឬយ៉ាង​ណោះនោះ​។

គួរបញ្ជាក់ថា ប្រជាជនប៉ាគីស្ថានប្រមាណ ១០៦លាននាក់ បានចុះឈ្មោះ​បោះឆ្នោត ហើយមាន​គណបក្សនយោបាយ ៣០ និងមានបេក្ខជន ១២,៥៧០នាក់ ចូលរួមប្រកួត​ប្រជែងក្នុងការ​បោះឆ្នោតនេះ។ ការិយាល័យបោះឆ្នោត ៨៥,០០០កន្លែង នឹងត្រូវបិទទា្វរនៅម៉ោង ០៦៖០០នាទីល្ងាចថ្ងៃពុធនេះ (ម៉ោងនៅក្នុងតំបន់) ដើម្បីរាប់សន្លឹកឆ្នោត​ក្រោមការ​ការពារសន្តិសុខពីមន្ត្រីប៉ូលិស និងយោធា ៨០០,០០០នាក់ នៅទូទាំង​ប្រទេសអាស៊ី​ខាងត្បូងមួយ​នេះ៕