(ឡាវ)៖ បើតាមព័ត៌មាន​ចុងក្រោយពីមន្ត្រីរដ្ឋាភិបាលឡាវ បានឱ្យ​ដឹងនៅរសៀល​ថ្ងៃពុធនេះ​ថា សាកសព​មនុស្ស ១៧នាក់ហើយ ត្រូវបានស្រង់ចេញពីក្នុងទឹក បន្ទាប់ពីទំនប់​វារីអគ្គិសនីមួយកន្លែង​នៅក្នុងប្រទេស​ឡាវ បានបាក់​កាលពីថ្ងៃអង្គារ ដោយបង្កជាគ្រោះ​ទឹកជំនន់នៅ​តាមភូមិ​ជាច្រើន និងមនុស្សបន្តបាត់ខ្លួនរាប់រយ​នាក់ទៀត។ នេះបើតាម​ការចេញផ្សាយ​ដោយ ទីភ្នាក់ងារសារព័ត៌មាន​ថៃ The Nation នៅរសៀលថ្ងៃពុធ ទី២៥ ខែកក្កដា ឆ្នាំ២០១៨។

អាជ្ញាធរឡាវ​កំពុងបង្កើនកិច្ចខិតខំប្រឹងប្រែង​ ស្វែងរកអ្នក​នៅរស់រានមានជីវិត ខណៈមនុស្ស​ច្រើនជាង ១០០នាក់ នៅតែ​បន្តបាត់ខ្លួន​នៅឡើយ ហើយរាប់ពាន់​នាក់ទៀត​បានបាត់បង់ផ្ទះ​សម្បែងរបស់​ពួកគេ។ អាជ្ញាធរ​ឡាវ​ កាលពី​ថ្ងៃអង្គារម្សិលមិញបានរាយការណ៍ថា ទំនប់វារីអគ្គិសនី​មួយកន្លែងបានដួលរលំ នៅខេត្ត Attapeu (អាត់តាពើ) ភាគអាគ្នេយ៍​​ប្រទេសឡាវជាប់​ព្រំដែន​ខេត្តស្ទឹងត្រែង​ព្រមទាំង​ខេត្ត​រតនៈគិរី ភាគឦសាន​នៃប្រទេស​​កម្ពុជា។

គួរជម្រាបថា ទំនប់ខាងលើត្រូវ​បាន​គេរាយការណ៍ថា បានទម្លាយទឹក​យ៉ាងជន់​ជោរ​ក្នុងទំហំ​​ប្រមាណ ០៥ពាន់លានម៉ែត្រគូបនៅក្នុងសង្កាត់ សានសៃ (San Sai) នៃ​ខេត្តអាត់តាពើ ហើយវាត្រូវបានសាងសង់​​ឡើង​​ដោយគម្រោង​រួមគ្នាមួយ ដឹកនាំដោយ​បណ្តាញ​ក្រុមហ៊ុន កូរ៉េខាងត្បូង សហការជាមួយ​​ថៃ និងឡាវផ្ទាល់៕