(អាតែន)៖ អាជ្ញាធរក្រិក បានឱ្យដឹងថាភ្លើងឆេះព្រៃដែលកំពុងលុកលុយលើតំបន់ Attica ស្ថិតនៅក្បែរទីក្រុងអាតែន បានសម្លាប់ មនុស្សកើនឡើងដល់៦០នាក់ហើយ ខណៈជាង១៥០នាក់ផ្សេងទៀតរងរបួស។ នេះបើតាមការចេញផ្សាយដោយសារព័ត៌មាន BBC នៅយប់ថ្ងៃអង្គារ ទី២៤ ខែកក្កដា ឆ្នាំ២០១៨។
រដ្ឋាភិបាលក្រិក បានបញ្ជូនក្រុមអ្នកពន្លត់អគ្គីភ័យរាប់រយនាក់ទៅកាន់តំបន់រងគ្រោះ ដើម្បីប្រយុទ្ធនឹងភ្លើងឆេះព្រៃ និងជួយជម្លៀស ប្រជាជននៅក្បែរទីក្រុងអាតែន ទៅកាន់ទីទួលមានសុវត្ថិភាព។ ដោយឡែក នៅក្នុងចំណោមជនរងគ្រោះ៦០នាក់ខាងលើក៏មាន ទាំងកុមារ ដែលបានស្លាប់ដោយសារតែភ្លើងឆេះព្រៃដ៏អាក្រក់បំផុត នៅក្នុងប្រទេសក្រិក អស់រយៈពេលរាប់ទសវត្សរ៍មកនេះ។
គួរបញ្ជាក់ថា ដោយសារតែភ្លើងឆេះព្រៃនេះ នាយករដ្ឋមន្ត្រីក្រិក លោក អាឡិចស៊ីស តាស៊ីប្រាស់ (Alexis Tsipras) បានលុប ចោលដំណើរទស្សនកិច្ចទៅកាន់ប្រទេសបូស្នី ដើម្បីជួយសម្របសម្រួលប្រតិបត្តិការជួយសង្រ្គោះ និងស្វែងរកជំនួយពីអន្តរជាតិ។ លោក តាស៊ីប្រាស់ ក៏បានប្រកាសកាន់ទុក្ខរយៈពេល៣ថ្ងៃផងដែរ៕
