(អាមេរិក)៖ រឿងហេតុមួយបានបង្កភាពចម្រូងចម្រាសមួយប្រាវ នៅក្នុងរដ្ឋហ្សកហ្ស៊ី (Goergia) នៃសហរដ្ឋអាមេរិក តាមរយៈឃ្លីបវីដេអូមួយបង្ហោះនៅលើបណ្តាញសង្គម Facebook ដែលបង្ហាញឲ្យឃើញពីសកម្មរបស់កងកម្លាំងប៉ូលិសអាមេរិក សង្កត់ក្មេងប្រុសស្បែកខ្មៅម្នាក់ទៅលើដី។ នេះបើតាមដកស្រង់ការផ្សាយចេញពីសារព័ត៌មានរុស្ស៊ី Sputnik នៅរសៀលថ្ងៃអង្គារ ទី២៤ ខែកក្កដា ឆ្នាំ២០១៨។
បើតាមនារីម្នាក់ឈ្មោះ អារៀល ខូលលីនស៍ (Ariel Collins) ជាអ្នកបង្ហោះវីដេអូ និងបានអះអាងថា ខ្លួនជាបងស្រីជីដូនមួយរបស់កុមារាខាងលើ ក្មេងប្រុសម្នាក់នោះ គឺគ្រាន់តែចង់ព្យាយាមនិយាយជាមួយឪពុករបស់គេ ដែលទើបត្រូវបានប៉ូលិសឃាត់ខ្លួនប៉ុណ្ណោះ។
នាង Collins បានប្រើពាក្យធ្ងន់សំដៅលើប៉ូលិស និងបាននិយាយថា នៅពេលរូបនាងទាញទូរស័ព្ទដើម្បីថតសកម្មភាពខាងលើនោះ ប៉ូលិសថែមទាំងបានរុញប្អូនជីដូនមួយរបស់នាងខ្ទប់នឹងរថយន្តរបស់ពួកគេ ខណៈពេលដែលកុមារម្នាក់នោះ ព្យាយាមនិយាយជាមួយឪពុក ដែលស្ថិតក្នុងរថយន្ត។ ប៉ូលិសបានឲ្យដឹងថា ក្មេងប្រុសម្នាក់នោះមានអាយុ ១០ឆ្នាំ ប៉ុន្តែនាងវិញ Collins បានអះអាងថាគេអាយុត្រឹម ០៧ឆ្នាំប៉ុណ្ណោះ។
គួរជម្រាបថា បើតាមការបកស្រាយពីប៉ូលិស តាមរយៈសេចក្តីថ្លែងការណ៍ ដែលចេញនៅប៉ុន្មានម៉ោងក្រោយការបង្ហោះវីដេអូខាងលើ រឿងហេតុដំបូងគឺប៉ូលិសបានចុះឃាត់ខ្លួន ឪពុករបស់ក្មេងប្រុសខាងលើ ដែលជាប់សង្ស័យក្នុងករណីប្រើអំពើហិង្សាក្នុងគ្រួសារ ប៉ុន្តែភ្លាមៗកុមារវ័យ ១០ឆ្នាំរូបនោះ ក៏បានចាប់ផ្តើមមានអារម្មណ៍ឆេវឆាវជាខ្លាំង ហើយសមាជិកគ្រួសារឃាត់មិនឈ្នះ រហូតដល់ថ្នាក់រត់បំបុកមន្រ្តីប៉ូលិសម្នាក់ ដែលធ្វើឲ្យពួកគេទាំងពីរនាក់ជ្រុលទៅខ្ទប់នឹងរថយន្តប៉ូលិស។
ក្រោយមកទើបប៉ូលិស សម្រេចសង្កត់ក្មេងខាងលើផ្ទាល់នឹងដី ដើម្បីព្យាយាមឲ្យគេរំងាប់អារម្មណ៍។ ចុងក្រោយនៅពេលក្មេងម្នាក់នោះ ស្ងប់អារម្មណ៍ហើយ គេក៏បានសុំប៉ូលិសនិយាយជាមួយឪពុក ខណៈប៉ូលិសក៏បានផ្តល់ការអនុញ្ញាតតាមសម្រួល៕
