(ឡូសអាន់ជែលឡែស)៖ ភ្លើងឆេះព្រៃដ៏សម្បើមមួយឈ្មោះ ហ្វឺហ្គូសុន «Ferguson Fire» កំពុងឆេះរីករាលដាល​ទៅកាន់ខិតជិត​ដល់ឧទ្យានជាតិ យ៉ូសេមីតេ (Yosemite) ដែលជារមណីយដ្ឋានដ៏ល្បីល្បាញមួយ ស្ថិត​នៅក្នុងរដ្ឋ​កាលីហ្វ័រញ៉ា​ភាគខាងលិច​សហរដ្ឋអាមេរិក។ នេះបើតាមការ​ចេញផ្សាយ​ដោយ​ ទីភ្នាក់ងារ​ព័ត៌មានចិនស៊ីនហួរ នៅព្រឹកថ្ងៃអង្គារ ទី២៤ ខែកក្កដា ឆ្នាំ២០១៨។

ភ្លើងឆេះព្រៃ Ferguson Fire ដែលបានចាប់​ផ្ដើមឆេះតាំងតែពី​ថ្ងៃទី១៣ ខែកក្កដានៅក្នុងតំបន់ព្រៃធម្មជាតិ Sierra National Forest បានរីករាលដាលដល់ ១៣៦គីឡូម៉ែត្រក្រឡា គិតត្រឹមព្រឹកថ្ងៃចន្ទសប្ដាហ៍នេះ (ម៉ោងនៅក្នុងតំបន់)។ ចំណែកឯ ក្រុមអ្នកពន្លត់អគ្គិភ័យសរុប ៣,០៦៦នាក់ កំពុងប្រយុទ្ធតស៊ូជាមួយអណ្ដាតភ្លើង ជាមួយការគំាទ្រពីឧទ្ធម្ភាគចក្រ ១៦គ្រឿង និងបរិក្ខាពន្លត់ភ្លើងជាច្រើនទៀត។

គួរបញ្ជាក់ថា ភ្លើងឆេះព្រៃ Ferguson Fire បានផ្ដាច់យកជីវិតអ្នកពន្លត់អគ្គិភ័យម្នាក់ និង ០៦នាក់ទៀតរងរបួសកាលពីជាង ១០ថ្ងៃ​មុននេះ ខណៈអាជ្ញាធរអាមេរិក ក៏បានព្រមានឲ្យ​ប្រជាជននៅក្បែរតំបន់រងគ្រោះ មានការប្រុងប្រយ័ត្ន​ខ្ពស់ចំពោះការកើន​ឡើងនៃសីតុណ្ហភាព​ផងដែរ៕