(បាងកក)៖ គ្រឿងប្រភេទមេតំហ្វេតាមីន ដែលមានចំនួនរហូតដល់ទៅជិត ១០លានគ្រាប់ ត្រូវបានប៉ូលិសថៃបង្ក្រាប និងរឹបអូសបាននៅតំបន់ជាយរាជធានីបាងកក កាលពីថ្ងៃអាទិត្យម្សិលមិញ។ នេះបើតាមការបញ្ជាក់ពីអគ្គមេបញ្ជារងនៃស្នងការប៉ូលិសថៃ លោក Chalermkiat Srivirakhan ដែលទើបធ្វើការប្រកាសព័ត៌មាននៅល្ងាចថ្ងៃចន្ទ ទី២៣ ខែកក្កដា ឆ្នាំ២០១៨។
មន្ត្រីប៉ូលិសជាន់ខ្ពស់របស់ថៃបានបញ្ជាក់ទៀតថា គ្រឿងញៀនខាងលើនេះ ត្រូវបានគឺយកទៅទុកចោលក្នុងអគារមួយ នៅក្នុងស្រុកក្លងលួង (Khlong Luang) នៃខេត្តផាទុមថានី ជាយទីក្រុងបាងកក ហើយបើតាមការរាប់ចំនួននោះ គ្រឿងញៀនប្រភេទមេតំហ្វេតាមីនេះមានចំនួនសរុប ៩,៨៥៩,០០០គ្រាប់។ បន្ថែមពីនេះ ម្សៅមេតំហ្វេតាមីនគ្រីស្តាល់ចំនួន ៥០ក្រាម ក៏ត្រូវបានរកឃើញនៅភ្ជាប់ជាមួយគ្នានោះដែរ។
គួរបញ្ជាក់ថា នៅក្នុងប្រតិបត្តិការនោះ ប៉ូលិសថៃបានឃាត់ខ្លួនជនសង្ស័យចំនួនពីរនាក់ ហើយបើតាមការសាកសួរជាបឋម គឺគ្រឿងដ៏ច្រើនសន្ធឹកសន្ធាប់ខាងលើនេះ អាចមានប្រភពមកពីរដ្ឋសាន (Shan) នៃប្រទេសមីយ៉ាន់ម៉ា ដែលស្ថិតនៅជាប់ខេត្តឈៀងរ៉ាយ ភាគខាងជើងប្រទេសថៃ ជាទីដែលក្រុមឧទ្ទាម Wa ធ្វើការដាំដុះ និងផលិតគ្រឿងញៀនយ៉ាងគំហុកតែម្តង៕
