(ហាណូយ)៖ មកទល់ពេលមនុស្សយ៉ាងតិច២០នាក់បានបាត់បង់ជីវិត និង១៦នាក់ផ្សេងទៀត នៅតែបន្តបាត់ខ្លួន ដោយ​សារ​ការ​វាយ​ប្រហារ​ពី​គ្រោះ​ធម្មជាតិទឹកជំនន់ នៅឯតំបន់ភាគកណ្តាលនិងខាងជើង នៃប្រទេសវៀតណាម។ នេះ​បើ​តាមការដកស្រង់ការផ្សាយ​ចេញពីទីភ្នាក់ងារព័ត៌មាន Reuters នៅព្រឹកថ្ងៃអាទិត្យ ទី២២ ខែកក្កដា ឆ្នាំ២០១៨។

គ្រោះធម្មជាតិដ៏អាក្រក់ខាងលើនេះ ត្រូវបានបង្កឡើងដោយ​ព្យុះទីហ្វុងឈ្មោះ Son Tinh ដែលបានបង្កការបំផ្លិចបំផ្លាញ និងផ្តាច់យក​ជីវិតមនុស្ស នៅក្នុងប្រទេសអាស៊ានមួយនេះ ចាប់តាំងតែពីថ្ងៃពុធសប្តាហ៍នេះ។ ​អាជ្ញាធរឧតុនិយមវៀតណាម បានព្រមានថាដងទន្លេ​នៅក្នុងខេត្ត Thanh Hoa និង Nghe An ភាគកណ្តាល អាចនឹងត្រូវជន់លិចនៅប៉ុន្មានថ្ងៃខាងមុខថែមទៀតផង។

គួរជម្រាបថា បើតាមការឲ្យដឹងពីអាជ្ញាធរវៀតណាម លំនៅឋានជាង៥,០០០ខ្នង បានរងការខូចខាត និងផ្ទៃដីដាំដុះរាល់ម៉ឺនហិក​តា ត្រូវ​បាន​បំផ្លិចបំផ្លាញខ្ទេចខ្ទី ដោយសារគ្រោះទឹកជំនន់។ ការធ្លាក់ភ្លៀងខ្លាំង ត្រូវគេរំពឹងថា នឹងបន្តកើតមានឡើងសម្រាប់​ប៉ុន្មាន​ថ្ងៃ​ខាង​មុខ​៕​