(ព្យុងយ៉ាង)៖ បណ្តាញព័ត៌មានរដ្ឋកូរ៉េខាងជើង Rodong Sinmum បានចេញផ្សាយព័ត៌មានដោយវាយប្រហារចំៗ ទៅលើបណ្តាសារព័ត៌មានកូរ៉េខាងត្បូងជាច្រើនថា ពុំបានធ្វើអ្វីទាល់តែសោះ ដើម្បីជួយឲ្យទំនាក់ទំនងកូរ៉េទាំងពីរបានប្រសើរឡើង។ នេះបើតាមការចេញផ្សាយដោយ ស៊ីនហួរ នាយប់ថ្ងៃសុក្រ ទី២០ ខែកក្កដា ឆ្នាំ២០១៨។
សារព័ត៌មានរដ្ឋកូរ៉េខាងជើងបានរិះគន់ដូចខាងលើនេះ គឺចង់សំដៅទៅលើបណ្តាសារព័ត៌មានជាច្រើនរបស់ទីក្រុងសេអ៊ូល ដែលនៅតែបន្តផ្សព្វផ្សាយព័ត៌មានអវិជ្ជមានពីកូរ៉េខាងជើង ស្ថិតនៅក្នុងន័យគាំទ្រចៅហ្វាយនាយរបស់ពួកគេនៅអាមេរិក។ បន្ថែមពីនេះសារព័ត៌មាន Rodong Sinmun ក៏បានសង្កត់ធ្ងន់ទៀតថា សារព័ត៌មានកូរ៉េខាងត្បូងខ្លះមិនបានអនុវត្តន៍ជាលក្ខណៈស្ថាបនា ដើម្បីជម្រុញទំនាក់ទំនងឲ្យល្អរវាងកូរ៉េទាំងពីរនោះឡើយ។
គួរបញ្ជាក់ថា ការរិះគន់របស់កូរ៉េខាងជើង គឺសមស្របទៅតាមកិច្ចព្រមព្រៀងកាលពីជំនួបរវាងលោក មូន ជែអ៊ីន និងលោក គីម ជុងអ៊ុន ជាប្រវត្តិសាស្ត្រនៅក្នុងទឹកដីព្រំដែនខាងកូរ៉េខាងត្បូង ដោយក្នុងនោះក៏មានចែងផងដែរអំពីតួនាទីរបស់បណ្តាសារព័ត៌មាននៃប្រទេសទាំងពីរ ដែលត្រូវផ្អាកការផ្សាយព័ត៌មានរិះគន់ និងវាយប្រហារគ្នាទៅវិញទៅមក ស្ថិតនៅក្នុងន័យស្តារទំនាក់ទំនងបងប្អូនទាំងពីរឲ្យប្រសើរឡើងវិញ៕
