(ដាម៉ាស់)៖ នាដើមសប្តាហ៍នេះកងទ័ពរដ្ឋាភិបាលស៊ីរី បានដណ្តើមកាន់កាប់តំបន់ទីទួលយុទ្ធសាស្រ្តដ៏អំណោយផលបំផុតមួយ នៅភាគពាយ័ព្យខេត្តដារ៉ាអា (Daraa) ភាគខាងត្បូងប្រទេសស៊ីរី។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសុក្រ ទី២០ ខែកក្កដា ឆ្នាំ២០១៨។
កងកម្លាំងរដ្ឋាភិបាលស៊ីរីត្រូវគេរាយការណ៍ថា បានចូលគ្រប់គ្រងក្រុង អាល់ហារ៉ាហ៍ (Al-Harrah) និងទីទួលដែលមានឈ្មោះដូចគ្នានេះ នៅភាគពាយ័ព្យនៃខេត្ត Daraa ខណៈអង្គការឃ្លាំមើលសិទ្ធិមនុស្សស៊ីរី ក៏បានធ្វើសេចក្តីរាយការណ៍ពីវឌ្ឍនភាពគួរឲ្យកត់សម្គាល់ ដែលសម្រេចបានដោយយោធាស៊ីរី នៅក្នុងខេត្ត Daraa ផងដែរ។
កងទ័ពស៊ីរីត្រូវគេអះអាងថា បានចូលទៅក្នុងទីក្រុងខាងលើ តាមរយៈការផ្សះផ្សាគ្នាជាមួយក្រុមឧទ្ទាម ដែលស្ថានការណ៍វិវឌ្ឍន៍នេះ អាចត្រូវចាត់ទុកថា ជាជោគជ័យដ៏សំខាន់មួយ ដោយសារតែសារសំខាន់ផ្នែកយុទ្ធសាស្រ្ត នៃក្រុងភាគខាងត្បូងនេះ រួមជាមួយទីទួលដ៏អំណោយផលរបស់វា។
កិច្ចព្រមព្រៀងនៃការផ្សះផ្សាទៀតសោត តម្រូវឲ្យក្រុមឧទ្ទាមប្រគល់សព្វាវុធរបស់ខ្លួន មកឲ្យកងកម្លាំងរដ្ឋាភិបាល ហើយបើកផ្លូវឲ្យកងទ័ពស៊ីរីចូលទៅក្នុងក្រុង និងអនុញ្ញាតឲ្យសមាជិកទាំងឡាយនៃក្រុមឧទ្ទាម ដែលមិនព្រមដកថយទៅកាន់តំបន់កាន់កាប់ដោយក្រុមឧទ្ទាម នៅភាគខាងជើងស៊ីរី ដើរចេញតាមសម្រួល។
គួរជម្រាបថា តំបន់យុទ្ធសាស្រ្តនេះ នៅមុនពេលធ្លាក់ក្រោមកណ្តាប់ដៃរបស់ក្រុមឧទ្ទាម កាលពីឆ្នាំ២០១៤ វាធ្លាប់ជាបន្ទាយយុទ្ធសាស្រ្តដ៏សំខាន់មួយរបស់រដ្ឋាភិបាលស៊ីរី នៅភាគខាងត្បូងប្រទេស៕
