(គូឡាឡាំពួ)៖ យន្តហោះដឹកអ្នកដំណើរមួយគ្រឿង របស់អាកាសចរណ៍ម៉ាឡេស៊ី ដែលមានគោលដៅចេញពីទីក្រុង ប្រ៊ីសប៊ែន (Brisbane) នៃប្រទេសអូស្រ្តាលី ឆ្ពោះមកកាន់រដ្ឋធានីគូឡាឡាំពួ នៃប្រទេសម៉េឡេស៊ីនោះ ត្រូវបានបង្ខំឲ្យបកក្បាលយន្តហោះត្រឡប់ក្រោយវិញ ដោយសារតែជួបបញ្ហាបច្ចេកទេស ដែលមិនទាន់មានការបញ្ជាក់។ នេះបើតាមការបញ្ជាក់ពីក្រុមហ៊ុនអាកាសចរណ៍ផ្ទាល់ ដកស្រង់ខ្លឹមសារដោយទីភ្នាក់ងារព័ត៌មានចិន ស៊ីនហួរ នៅល្ងាចថ្ងៃព្រហស្បតិ៍ ទី១៩ ខែកក្កដា ឆ្នាំ២០១៨។
នៅក្នុងសេចក្តីថ្លែងការណ៍ខាងលើ ក្រុមហ៊ុនអាកាសចរណ៍ជាតិរបស់ម៉ាឡេស៊ីបានបញ្ជាក់ថា ជើងហោះហើរលេខ MH134 របស់ខ្លួន ដែលបានហោះចេញមកពីអាកាសយានដ្ឋានអន្តរជាតិ Brisbane កាលពីយប់ថ្ងៃពុធសប្តាហ៍នេះ (ពេលវេលាក្នុងតំបន់) ដើម្បីឆ្ពោះមកកាន់ទីក្រុងគូឡាឡាំពួ បានបកក្បាលត្រឡប់ក្រោយនៅលើផ្ទៃអាកាសទៅកាន់ទីក្រុង Brisbane វិញ។
គួរជម្រាបថា មូលហេតុដែលបានបង្កឲ្យមានរឿងហេតុដូចខាងលើ គឺពុំត្រូវបានអាកាសចរណ៍ម៉ាឡេស៊ី បញ្ជាក់លម្អិតនោះឡើយគ្រាន់តែប្រាប់ថា វាជាបញ្ហាផ្នែកបច្ចេកទេស ដែលកើតមានក្រោយការហោះឡើងចេញពីព្រលានយន្តហោះ។ ដោយសារតែសុវត្ថិភាព និងអ្នកដំណើរ ព្រមទាំងអ្នកបម្រើការលើយន្តហោះ មានសារសំខាន់លើសអ្វីៗបំផុតនោះ ក្រុមអាកាសយានិក ក៏បានសម្រេចចិត្តវិលត្រឡប់ទៅ Brisbane វិញ។ ជើងហោះហើរ MH134 បានត្រឡប់ទៅចុះចតនៅអាកាសយានដ្ឋានអន្តរជាតិ Brisbane វិញដោយសុវត្ថិភាព ហើយយន្តហោះកំពុងស្ថិតក្រោមការត្រួតពិនិត្យផ្នែកបច្ចេកទេស និងការជួសជុលកែតម្រូវ៕
