(អាមេរិក)៖ ការបន្តផ្ទុះជះកម្អែរភ្លើងឥតស្រាកស្រាន្តរបស់ភ្នំកាឡូអៀ (Kilauea) នៃរដ្ឋហាវ៉ៃ បានផ្តល់កំណើតដល់កូនកោះថ្មីតូចមួយ នៅក្បែរនឹងមាត់ឆ្នេរ ដែលក្រោយមកក៏បានរលាយបាត់ទៅវិញ។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃពុធ ទី១៨ ខែកក្កដា ឆ្នាំ២០១៨។
បើតាមទីភ្នាក់ងារស្ទាបស្ទង់ភូមិសាស្រ្តអាមេរិក USGS កូនកោះខាងលើដែលមានប្រវែងចន្លោះពី ០៦ម៉ែត្រ ទៅ ០៩ម៉ែត្រ ត្រូវបានបង្កើតឡើងដោយកម្អែរភ្នំភ្លើង Kilauea និងបានបង្ហាញខ្លួន នៅចម្ងាយតែប៉ុន្មានម៉ែត្រប៉ុណ្ណោះពីមាត់ឆ្នេរសមុទ្រនៅភាគខាងជើងកោះហាវ៉ៃ។ យ៉ាងណាមិញបន្តិចក្រោយមក កោះតូចមួយនេះ ក៏បានរលាយបាត់ស្រមោលទៅវិញ។
គួរជម្រាបថា ភ្នំភ្លើង Kilauea ដែលសកម្ម និងមានអាយុកាលតិចជាងគេបង្អស់លើលោកនោះ បាននិងកំពុងបន្តផ្ទុះស្ទើរតែគ្មានឈប់ឈរ ចាប់តាំងពីដើមខែឧសភាមក និងបានលេបត្រដាក់លំនៅឋានអស់រាប់រយខ្នង ហើយនាដើមសប្តាហ៍នេះ ដុំកម្អែរភ្លើងពី Kilauea បានធ្លាក់ចំលើទូកទេសចរណ៍មួយគ្រឿងថែមទៀតផង ដែលបានបង្កឲ្យមនុស្ស ២៣នាក់រងរបួស៕
