(អាហ្វហ្គានីស្ថាន)៖ សមាជិកក្រុមសកម្មប្រយុទ្ធរហូតដល់ ៦២នាក់បានស្លាប់ ក្នុងការវាយប្រហារតាមផ្លូវអាកាស ដឹកនាំដោយកងយន្តហោះចម្បាំងអាហ្វហ្គានីស្ថាន នៅខេត្តកាន់ដាហារ (Kandahar) ភាគខាងត្បូងប្រទេស គិតត្រឹមរយៈពេល ២៤ម៉ោងចុងក្រោយនេះ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅរសៀលថ្ងៃអង្គារ ទី១៧ ខែកក្កដា ឆ្នាំ២០១៨។
បើតាមអ្នកនាំពាក្យយោធាអាហ្វហ្គានីស្ថានប្រចាំតំបន់ភាគខាងត្បូង កងយន្តហោះចម្បាំងរបស់កងទ័ពអាហ្វហ្គានីស្ថាន បានបើកប្រតិបត្តិការវាយលុកដោយទម្លាក់គ្រាប់បែក លើកន្លែងលាក់ខ្លួនរបស់ក្រុមឧទ្ទាមតាលីបង់ នៅស្រុកម៉ារូហ្វ (Maroof) នៃខេត្តភាគខាងត្បូង Kandahar ជាច្រើនលើកក្នុងអំឡុងពេល ២៤ម៉ោងប៉ុណ្ណោះ ដោយបានផ្តាច់ជីវិតជនសកម្មប្រយុទ្ធ ៦២នាក់ ក្នុងនោះមានមេបញ្ជាការប្រចាំតំបន់របស់ក្រុមឧទ្ទាមម្នាក់បានស្លាប់ និង០៣នាក់ទៀតរបួស។
គួរជម្រាបថា នៅក្នុងហេតុការណ៍មួយដាច់ដោយឡែកផ្សេងទៀត ប៉ូលិសចំនួន ០៩នាក់ បានបាត់បង់ជីវិត និង០៧នាក់រងរបួស នៅក្នុងការប៉ះទង្គិចគ្នាដ៏កក្រើកមួយ ជាមួយពួកតាលីបង់ នៅឯស្រុកមួយទៀតស្ថិតនៅក្បែរខាងក្នុងខេត្ត Kandahar ជាមួយគ្នា៕
