(ហ្វាំងឡង់)៖ នៅទីបំផុត​ជំនួបកំពូលទ្វេភាគី​ផ្លូវការជាលើកដំបូង រវាងប្រធានាធិបតី​អាមេរិក​លោក ដូណាល់ ត្រាំ និងប្រធានាធីបតីរុស្ស៊ីលោក វ្ល៉ាឌីមៀ ពូទីន ចាប់ផ្តើម​ប្រព្រឹត្តទៅហើយនៅឯវិមានប្រធានាធិបតី នៃទីក្រុងហែលស៊ីនគី ប្រទេសហ្វាំងឡង់។ នេះបើតាមការចេញផ្សាយដោយ សារព័ត៌មានរុស្ស៊ី Sputnik នាល្ងាចថ្ងៃចន្ទ ទី១៦ ខែមិថុនា ឆ្នាំ២០១៨ ត្រូវនឹងពេលរសៀលថ្ងៃចន្ទ នៅទីក្រុងហែលស៊ីនគី។

នេះគឺជាការជួបមុខគ្នាលើកទី ៣ សម្រាប់មេដឹកនាំទាំងពីរ ប៉ុន្តែគឺជាលើកដំបូងបំផុត​នៃជំនួបកំពូលទ្វេភាគីជាផ្លូវការរវាង លោក ត្រាំ និងលោក ពូទីន ខណៈបញ្ហាក្តៅគគុក​ជាច្រើនកំពុងស្ថិតនៅលើតុស្រាប់ ដើម្បីមេដឹកនាំប្រទេសទាំងពីរ ធ្វើការពិភាក្សានឹង​ដោះដូរយោបល់គ្នានៅរសៀលថ្ងៃចន្ទនេះតែម្តង។

គួរបញ្ជាក់ថា ក្រោយចុះពីលើយន្តហោះភ្លាម លោក ពូទីន បានធ្វើដំណើរមកចាំលោក​ ដូណាល់ ត្រាំ មុននៅឯវិមានប្រធានាធិបតី នៃទីក្រុងហែលស៊ីនគី ប្រទេសហ្វាំងឡង់ ហើយប៉ុន្មាននាទីក្រោយមក​ទៀតទើបលោក ដូណាល់ ត្រាំ បានធ្វើដំណើរ​មកដល់តាម​ក្រោយ ហើយជំនួប​កំពូលជាលើកដំបូង ក៏ត្រូវបានចាប់​ផ្តើមឡើង​តែម្តង៕